.png)
Në ditën e ceremonisë mortore të Emiliano Sala, i cili humbi jetën tragjikisht pas rrëzimit të avionit në kanalin e Lë Manshit, është hapur një kapitull i ri në “luftën” mes Kardifit dhe Nantës për pagesën e transferimit të lojtarit argjentinas. Klubi francez është gati t’i drejtohet UEFA-s, pasi nuk e ka përfituar ende shumën e 17 milionë eurove, sipas marrëveshjes me Kardifin. Klubi anglez, në anën tjetër, po përpiqet të kuptojë, nëse çmimi ishte rritur për shkak të një ankandi fiktiv nga Uilli MekKei, ish-prokuratori i sulmuesit.
Kanë kaluar emocionet e dhimbjes për lamtumirën e Emiliano Salas nga ai aksident i tmerrshëm, kur avioni me të cilin po shkonte drejt Kardifit, u rrëzua. Tani është koha e llogarive. Avokatët e Kardifit po kontaktojnë me klube të tjera të Premier League për të kuptuar, nëse Evertoni, Uest Hemi, Kristal Palas, Fulhemi, Bërnli dhe Volverhemptoni ishin realisht të interesuar për argjentinasin, apo ishin pjesë e një strategjie që solli rritjen e çmimit të kartonit të lojtarit.
Praktikisht, Kardifi po kërkon një ulje në këtë rast. Nëse ankandi për Salan ka qenë fiktiv, vlera reale e kartonit të tij është më e ulët. Një ndihmë në këtë rast mund ta japë agjenti MekKei, që në një e-mail dërguar Sala, shkruante se kishte folur me mediet sportive për oferta skuadrash të tjera pikërisht për të rritur interesimin ndaj tij. Gjithsesi, këto përpjekje duken të kota për Kardifin, sepse edhe nëse ka qenë një ankand fiktiv, është pjesë e logjikës së merkatos. Në çdo mënyrë, çmimi final është firmosur nga të dy klubet në kontratën e blerjes së sulmuesit nga Kardifi, që tani duhet të shlyejë Nantën.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje