.png)
Pas humbjes në Durrës, trajneri Armando Cungu i kishte orët e numëruara në stolin e Kukësit. Një ditë më pas u përhap lajmi për shkarkimin nga detyra të trajnerit shkodran, por që ende nuk është zyrtarizuar nga klubi i Kukësit. Presidenti Safet Gjici nuk fal në situata të tilla, ku pas investimeve të bëra edhe në merkaton e dimrit, skuadra e tij jo vetëm që nuk e kaloi Partizanin, por iu largua më shumë rivalit për titull dhe ky objektiv tani duket i pamundur për t’u realizuar.
Drejtimin e skuadrës kuksiane pritet ta marrë Ramadan Ndreu, pjesë e stafit drejtues të klubit verilindor. Por edhe për këtë mungon zyrtarizimi. Presidenti Safet Gjici ka pasur një takim paraditen e së dielës me trajnerin Cungu, me shumë gjasa për mbylljen e bashkëpunimit mes tyre. Cungu ka munguar në stërvitje, çka e bën thuajse të sigurt largimin përfundimtar të tij. Kukësi është drejtuar në stërvitje nga Rrahman Hallaçi, ndihmësi i trajnerit shkodran, që e kishte marrë drejtimin e ekipit verën e kaluar.
Kukësi ka bërë dy humbje radhazi dhe trysnia mbi këtë ekip u duk qartë sidomos në ndeshje me Teutën, ku nga avantazhi 0-1, u përmbys në pak minuta në 2-1. Pas blerjeve të bujshme të janarit, presidenti Gjici i dha një mesazh të qartë trajnerit Cungu dhe ekipit, duke e kaluar “topin” në fushën e tyre, por nuk mori përgjigjen e duhur dhe tani lëvizja në stol duket e pashmangshme.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje