.png)
Pavarësisht tensioneve me Beogradin dhe përplasjen për taksat ndaj importeve serbe, Kryeministri Ramush Haradinaj ka ndërmarrë ditën e sotme një nga lëvizjet më të papritura duke ftuar në Prishtinë kryeministren e Serbisë, Ana Brnabiç.
Burime për Gazetën Si kanë konfirmuar se Haradinaj synon të mbledhë kryeministrat e rajonit në prill në Prishtinë duke ftuar kështu edhe homologen e tij serbe.
Kjo do të ishte vizita e parë e Brnabiç në Kosovë dhe vizita e parë e një kryeministri serb në Prishtinë pas shpalljes së pavarësisë. Komisioneri Evropian për Politikat e Fqinjësisë Evropiane dhe Negocimet e Zgjerimit Johannes Hahn pritet të ftohet gjithashtu në këtë takim.
Kryeministrja e Serbisë reagoi menjëherë pas raporteve duke thënë se deri më tani nuk ka marrë asnjë ftesë.
“Nuk kam marrë asnjë ftesë për një takim të tillë”, ka deklaruar Branabiç, e cila ka akuzuar kryeministrin Haradinaj se po përpiqet t’u hedhë hi syve Bashkimit Europian dhe Shteteve të Bashkuara duke organizuar një samit rajonal në Prishtinë.
Sipas burimeve, tema qendrore e këtij takimi pritet të jetë e ardhmja euroatlantike e rajonit dhe strategjitë për forcimin e bashkëpunimit rajonal.
Ka kaluar njëzet vjet që nga përfundimi i luftës dhe që atëherë asnjë nga kryeministrat serbë nuk e ka vizituar Kosovën, edhe pse janë ftuar disa herë nga kryeministrat e Kosovës.
Presidenti Aleksandër Vuçiç dhe Ministri i Jashtëm Ivica Daçiç kanë vizituar disa herë Mitrovicën dhe disa zona të tjera me shumicë serbe, por jo Prishtinën, mes frikës se kjo do të nënkuptonte njohjen e sovranitetit të Kosovës. Por po ashtu asnjë vizitë e kryeministrit apo presidentit të Kosovës nuk është realizuar as në Luginën e Preshevës e jo më ne Beograd.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje