.png)
“Sun” në Angli ka lëshuar “bombën”: Mançester Sitit do t’i hiqet e drejta për të bërë merkato në dy sesionet e ardhshme të saj, në merkaton e verës së ardhshme dhe në merkaton e dimrit. Skuadra e drejtuar nga trajneri Pep Guardiola duhet ta vuajë këtë ndëshkim, pasi nuk ka respektuar vitet e fundit rregullat për transferimin e futbollistëve minorenë.
Lajmi që vjen nga Anglia ka bërë bujë. Për Mançester Sitin është një tronditje e fortë, edhe pse për momentin ende nuk ka një konfirmim zyrtar për dënimin e klubit anglez. Sipas “Sun”, që në faqe të parë ka pikërisht këtë lajm ekskluziv, klubi i sheikëve dhe Guardiolës brenda pak ditësh do të mësojë zyrtarisht vendimin e dënimit nga UEFA, që po e heton. Mançester Siti, një nga klubet më aktive në merkato, nuk do të lejohet të blejë futbollistë në verë dhe në dimër. Është një dënim i ngjashëm me atë që është dhënë më parë për Çelsin dhe Barcelonën nga UEFA.
Tabloidi britanik është i sigurt për lajmin dhe saktëson se klubi i sheikut Mansour do të ndëshkohet për shkak të dhunimit të rregullave për transferimin e lojtarëve minorenë. “Sin City” është loja e fjalëve që ka zgjedhur tabloidi për të përshkruar situatën e klubit anglez. Nëse konfirmohet ky lajm, Pep Guardiola nuk do të ketë mundësi të bëjë përforcime në dy sesionet e ardhshme të merkatos dhe kjo do të thotë se Mançester Siti do të vazhdojë me grupin aktual të lojtarëve deri në verën e vitit 2020.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje