.png)
Ivan Xhenaro Gatuzo e provoi, vuri një bast të rrezikshëm dhe e humbi. E dinte që Milani i tij nuk ishte shëruar nga “sëmundja” që e ka kapur prej 40 ditësh, ku ka marrë vetëm një fitore në shtatë ndeshje. Në ndeshjen me Lacion ai luajti “kartën” e revolucionit: mbrojtje me tre, e aplikuar vetëm në tri ndeshje të këtij sezoni, aktivizoi Kaldarën pas shtatë muajsh, Paketa në stol dhe dy sulmues në 30 minutat e fundit. Megjithatë, edhe dyshja Piatek-Kutrone nuk e prishi “magjinë” dhe Milani doli nga Kupa e Italisë me vetëm dy gjuajtje në portë në 93 minutat e ndeshjes me Lacion.
Do të ishte e padrejtë të kritikosh vetëm dy sulmuesit, që dikush duhet t’i furnizojë me topa. Në fakt, është e vështirë të veçosh individë të caktuar si fajtorë për gjendjen e Milanit, ndaj dhe tifozëria kërkon me zë të lartë largimin e trajnerit Gatuzo. Problemi është pikërisht drejtuesi teknik i skuadrës, sepse Milani i ndërtuar ashtu si trajneri ka dashur, kompakt dhe me karakterin e tij, u zhduk dhe çoi dëm gjithë punën e bërë në muajt e mëparshëm, duke rrezikuar vendin e katërt në kampionat dhe duke u eliminuar nga Kupa e Italisë, ku kishte ardhur me meritë deri në gjysmëfinale.
Pa lojtarë që dinë të zgjidhin ndeshjen, – pa harruar këtu kontributin e Leonardos në janar me Paketën edhe Piatek, – është shumë e vështirë të bësh ndryshimin e madh në momente të tilla dhe të ta aplikosh modulin e ri të lojës me lojtarët që kanë luajtur më pak gjatë sezonit. Duket shumë i vështirë gjithashtu një ndryshim trajneri pesë javë para fundit të kampionatit dhe objektivi i fundit që i ka mbetur Gatuzos është të mbajë vendin e katërt, që e çon Milanin në Champions. Vetëm me kualifikimin në Champions League trajneri mund të konfirmohet.
Tani duhet më shumë punë me mendjen se me këmbët e lojtarëve. Ndonjëherë në futboll mjafton shumë pak për të ndezur një shkëndijë. Mund të ndodhë kjo me rikthimin e Paketës, për shembull, me një fitore të mundshme në fushën e Torinos, apo edhe me rikthimin te skema 4-3-3 me lojtarët e duhur. Tani trajneri Gatuzo duhet të punojë me shpirtin, ndërgjegjen dhe dëshirën e futbollistëve. Nëse e bën këtë si duhet, gjithçka tjetër do të jetë më e lehtë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje