.png)
Ishte thjesht një formalitet, tani është zyrtare: Luçiano Spaleti nuk është më trajner i Interit. Shkarkimi i trajnerit toskan, që e ka çuar ekipin zikaltër dy herë në Champions League, është zyrtarizuar me një njoftim në faqen e klubit italian, ku shkruhet: “FC Inter bën me dije se Luçiano Spaleti nuk është më trajner i skuadrës së parë. Klubi e falënderon trajnerin për punën e kryer dhe për rrugëtimin e bërë së bashku”.
Tashmë mund të thuhet se tek Interi ka nisur zyrtarisht era “Konte”. Ish-trajneri i Juventusit dhe Çelsit ka firmosur një kontratë 3-vjeçare për 9 milionë euro plus bonuset në sezon. Emërimi i tij në krye të stolit zikaltër do të zyrtarizohet nesër, kurse të shtunën në mbrëmje, bashkë me drejtuesit e klubit, presidentin Steven Zhang dhe Bepe Marotën, do të jetë në Madrid për të ndjekur finalen e Championsit midis Liverpulit dhe Totenhemit.
Spaleti ka pohuar se do të kalojë disa ditë pranë familjes në Toskana. Ai është lajmëruar për shkarkimin në telefon nga Marota, por duket se ndarja mes palëve nuk është ajo më e mira. Trajneri Spaleti kishte kontratë me Interin deri në vitin 2021 dhe është dukur shumë i zhgënjyer për mënyrën si përfundoi “martesa” me këtë ekip. Ai i ka drejtuar zikaltrit në 90 ndeshje në 2 sezone. Marota do të presë për momentin, para se të ulet në tavolinë me ish-trajnerin për të diskutuar disa detaje të tjera, sepse Spaleti do të kërkojë të paguhet ende nga klubi nga Milano.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje