.png)
Atë që nuk e bënë dot tërmetet, përmbytjet, zjarret dhe luftërat në 12 mijë vite histori, dora e njeriut e realizon brenda pak viteve. Banorët e qytetit Hasankeyf në jug-lindje të Turqisë duhet të largohen nga shtëpitë e tyre para datës 8 tetor.
Ky është urdhri që kanë marrë nga autoritetet turke rreth 15 mijë banorë që kanë mbetur ende në këtë qytet. Vendimi lidhet me hapjen e digës që do të realizojë përmbytjen e kontrolluar të qytetit dhe zonave përreth nga ujërta e lumit Tigër për të ngritur një hidrocentral.
Arkeologët kanë dokumentuar prej kohësh se qyteti Hasakeyf banohet prej të paktën 12 mijë vitesh, duke qenë herë kryeqendër dhe herë periferi e kulturave të ndryshme, apo miksimi kulturash, që nga qytetërimi antik i Mesopotamisë, e deri tek bizantinët, arabët dhe osmanët në fund.
E gjithë kjo trashëgimi do të varroset nën ujërat e rezervuarit të hidrocentralit në fjalë, që do të përmbytin zona arkeologjike me rëndësi. Diga për ndërtimin e këtij HEC-i nisi që në vitin 2005. Në atë kohë qyteti banohej nga 55 mijë persona.
Zbulimet arkeologjike të lëvizshme janë zhvendosur prej kohësh, por arkeologët “vajtojnë” zhdukjen e një rrjeti dhe sistemi të tërë shpellash, që do të pushtohen nga uji, që dikur kanë qenë të banueshme dhe një pjesë e të cilave banohet ende edhe sot.
Arkeologë turq dhe ndërkombëtarë ngritën alarmin duke kërkuar që projekti të ndryshojë, pasi nëntoka e zonës që do të përmbytej mund të fshehë të tjera dëshmi me rëndësi të antikitetit.
“Nëse gërmon këtu do të gjesh kultura që i mbivendosen njëra-tjetrës”, deklaroi për The Guardian një banor vendas.
Tashmë, qyteti do të zhvendoset rreth 4 kilometra më tutje dhe bashkë me të edhe zbulimet arkeologjike të realizuara ndër vite aty. Aktualisht janë më pak se 6 mijë banorë që nuk janë shpërngulur ende, ndërkohë që përveç mobiljeve dhe orendive shtëpiake, ata kanë kërkuar kohë që të zhvendosin nga varrezat e qytetit eshtrat e të afërmve të tyre.
Qeveria turke ka përzgjedhur që prej vitit 1980 qytetin Hasakeyf si zona më e përshtatshme për ndërtimin e HEC-it Ilisu, që ka si objektiv furnizimin me energji elektrike të të gjithë rajonit. Rezervuari ka një kapacitet prej 11 miliardë metër/kub ujë, ndërsa energjia elektrike e prodhuar do të jetë 1200 MegaWatt.
Burimi: Business Insider
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje