.png)
Gjatë natës së kaluar është ngritur sipari i edicionit të 47-të të Kupës së Amerikës, që luhet verën e ardhshme, në të njëjtën kohë me Europianin. Në ceremoninë e zhvilluar në Kolumbi, kanë marrë formë dy grupet me nga 6 skuadra që do të nisin fazën e parë. Është përcaktuar edhe kalendari i kompeticionit, që zgjat ekzaktësisht një muaj, nga data 12 qershor deri më 12 korrik.
Para hedhjes së shortit për ndarjen e grupeve, është prezantuar maskoti i Kupës së Amerikës, i quajtur “Pibe” dhe që ka marrë 200 mijë pëlqime. Kupa e Amerikës e vitit të ardhshëm është edicioni i parë i përshtatur me kalendarin europian dhe ndoshta i fundit për Lionel Mesin, i cili do të jetë 33 vjeç. Argjentinasi që sapo ka fituar “Topin e Artë” do të ketë një tjetër shans për të fituar trofeun e parë me fanellën bardhekaltër, pasi ka humbur tri finale kontinentale dhe një finale Botërori, atë të 2014-s.
Turneu do të organizohet për herë të parë në dy shtete, në Argjentinë dhe në Kolumbi, me 9 qytete pritëse që janë: Buenos Aires, Mendoza, Kordoba, La Plata, Santiago del Estero, Medelin, Bogota, Barrankuila dhe Kali. Në short është vendosur që ndeshja inauguruese të jetë Argjentinë-Kili, më 12 qershor, në “Monumental” të Buenos Airesit, ndërsa finalja do të luhet më 12 korrik në Barrankuila.
Faza e parë e Kupës së Amerikës zhvillohet në dy grupe, me 12 skuadra pjesëmarrëse, mes tyre edhe Australia dhe Katari, që janë dy të ftuarit. Në Grupin A bëjnë pjesë Argjentina, Kili, Uruguai, Paraguai, Bolivia dhe Australia, kurse në Grupin B bëjnë pjesë Brazili, Kolumbia, Ekuadori, Venezuela, Peruja dhe Katari. Katër skuadrat e para të çdo grupi do të kalojnë në fazën tjetër të kompeticionit, atë me eliminim direkt.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje