.png)
Presidenti Ilir Meta si në kundërpërgjigje të sulmeve të PS-së nga Pallati i Kongreseve, 10 metra larg selisë së Presidencës, doli në konferencë për median duke paraqitur ato që i konsideron provat të reja që faktojnë, sipas tij, grushtin e shtetit nga mazhoranca socialiste.
Presidenti pas depozitimit të raportit të komisionit të Ligjeve për ligjin që i ia heq kompetencat për betimin e anëtarëve të Gjykatës Kushtetuese, ka nisur të interesohet për vërtetësinë e fakteve që paraqiten, ku Parlamenti thekson se është konsultuar me grupet e interesit përpara votimit.
Kështu Meta i është drejtuar Komitetit Shqiptar të Helsinkit, Fondacionit Soros, Institutit të Studimeve Politike, Shkollës së Magjistraturës, Këshillit të Lartë të Prokurorisë, duke deklaruar se asnjë nuk ka dhënë mendime për ligjin për të cilin ai e cilëson si grushti i shtetit të mazhorancës. Ai deklaroi se i ka kërkuar mendim edhe misionit Euralius, por që deri më tani nuk i ka kthyer përgjigje zyrtare. “Komisioni i Ligjeve në raportin e datës 6 shkurt rezulton se ka përcjellë një informacion të qëllimshëm të gënjeshtërt, duke përdorur si mekanizëm mbrojtës përmes njw raporti të dy nismave ligjore, ligjin për Gjykatën Kushtetuese dhe ligjin për Statusin e Gjyqtarëve e Prokurorëve, ndërkohë që shqyrtohej vetëm ligji i parë, sepse duhej të nxitonin që t’i thoshin Venecias që ligjin për të cilën ju ftuam e mbyllëm dje, prandaj këto ditë bëni turizëm. Kjo manovër mashtruese dhe e pacipë e këtij sekti kriminal që ka kapur për fyti Kuvendin e Shqipërisë dhe institucionet e shtetit është kryer për të krijuar imazhin se dhe pr/ligji për ndryshimet në ligjin për gjykatën Kushtetuese është konsultuar duke marrë mendimet e institucioneve të mësipërme”, deklaroi Meta.
Presidenti është pyetur në këtë konferencë për paralajmërimin e ambasadës amerikane të 2 marsit që qytetarët e SHBA-së të shmangin daljet në bulevardin “Dëshmorët e Kombit”, të hënën pasdite.
“Zero shqetësim, zero frikë, për manifestimin më paqësor, më demokratik, më gjithëpërfshirës e vetëm kuqezi në 2 mars. Për gjithë qytetarët e shqiptarët që kanë dëshirë e ndiejnë që zëri i tyre duhet të dëgjohet, pasi kushtetuta është dokumenti themeltar i këtij shteti dhe vetëm mbrojtja e saj e garanton unitetin tonë kombëtar e garanton shtetin e së drejtës e të ardhmen europiane. Alert ka vetëm për grupin puçist, kush e ndjen vetën puçist është i alertuar, Pse? Sepse është thirrur populli”., theksoi Meta, ndërsa bëri të ditur se shumë qytetarë të huaj që jetojnë në Shqipëri kanë shprehur dëshirën për të marrë pjesë dhe folur në këtë tubim. Sipas tij në këtë tubim do të marrin pjesë edhe shqiptaro-amerikanë, si dhe shqiptarë që jetojnë në shtete të tjera si Britani e Madhe apo dhe Zvicër.
Kreu i shtetit ndërkaq bëri të ditur se ka pasur takime me drejtuesit e lartë të policisë për të manifestimin, duke bërë të ditur se i ka kërkuar që më 2 mars të ketë më pak policë prezent.
Meta është pyetur në lidhje me arrestimin e fundit të botuesit Henri Çili, duke i kërkuar mendim nëse ai është peshku i madh i drejtësisë. Kreu i shtetit ka aluduar se këto janë edhe si skenarë të puçistëve që janë trembur nga dalja në shesh e popullit. “Nuk do të habitesha për shkak të frikës grupit puçist, se për shkak të lidhjeve me Italinë, do të dilte lajmi se zoti Fatos Lubonja, apo Artur Zheji u arrestuan, sepse dyshohet se drejtohet organizatën e Kamorras dhe të Ndragetës, apo te pallati pranë Presidencës u gjetën dy persona me coronarisurs. Alerti është diku tjetër që duan të shmangin një ngjarje shumë të madhe me të cilën është bashkuar çdo qytetar në këtë vend, zërin me të cilin do t’i bashkohet e gjithë Shqipëria”, theksoi presidenti.
Por çfarë do të ndodhë pas 2 marsit? Presidenti paralajmëroi se asgjë nuk do të mbyllet me këtë manifestim, duke kujtuar edhe 1 prillin, ditën kur vite më parë në Shkodër, u firmos pakti politik i koalicionit bashkëqeverisës mes PS-së dhe LSI-së shtatë vite me parë.
“Asgjë nuk mbaron më 2 mars, ka edhe 3 mars, ka edhe 1 prill, dhe e shikoni sa 1 prilla kemi këtu. Për ligjin ndoshta nga më të rëndësishmit që ka të bëjë me integritetin e anëtarëve të GJK që duhet të jenë garant të sovranitetit e integritetit të atdheut tonë s’bëhet fjalë për disa vende pune, po për të mbrojtur shtetin e pushtetin nga puçistët sot e në çdo vend.Pa Kushtetutë nuk ka demokraci dhe pa demokraci në këtë periudhë globalizmi s’ka as Shqipëri. Kështu që në 2 mars kemi vetëm një nisje, e cila në çdo rast e në çdo drejtim që do eci do bëjë të mundur që shqiptarët të kuptojnë që nëse demokracia jonë e shteti degradoi deri sa presidenti ti drejtohet popullit, ndodhi për shkak se në 22 vjet u përdhos në mënyrën më të pabesë, poshtër e më mafioze së fundmi, vullneti i popullit në referendum. 2 marsi do hyjë në historinë e Shqipërisë si nisja e ndërgjegjësimit të shqiptarëve për shenjtërimin e kushtetutës sonë“, theksoi kreu i shtetit.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje