.png)
Ambasadorja amerikane Yuri Kim ka ndërmarrë prej ditësh disa takime që synojnë të çtensionojnë situatën politike në vend. Një ditë pasi ambasadorja amerikane u takua me Ministren e Drejtësisë, Etilda Gjonaj, të premten Kim ngjiti shkallët e selisë së LSI-së, për t’u takuar me kryetaren e kësaj partie, Monika Kryemadhi. Takimi ka zgjatur për një orë e gjysmë dhe se mendohet që çështja kryesore ka qenë situata politike dhe reforma zgjedhore.
Lëvizja Socialiste për Integrim prej ditësh ka shtuar dozën e sulmeve ndaj ministres së Drejtësisë, Etilda Gjonaj, duke mbështetur akuzat e Presidentit për falsifikim të procedurës për emërimin e anëtarëve të Gjykatës Kushtetuese. Por zyra e shtypit e LSI-së në lidhje me takimin e sotëm bën të ditur se biseda mes Kryemadhit dhe ambasadores Yuri Kim u përqendrua te reforma zgjedhore, duke mos përmendur çështjen e emërimeve në Gjykatën Kushtetuese, apo reformën në drejtësi.
“Takimi zgjati rreth 1 orë e gjysmë, në fokus të saj ishte reforma zgjedhore, ku të dyja palët kanë ndarë angazhimin e përbashkët për realizimin e saj brenda datës 15 mars 2020, si datë e përcaktuar në marrëveshjen e dakordësuar mes opozitës së bashkuar dhe mazhorancës për reformën zgjedhore. Kryemadhi konfirmoi vullnetin e palëkundur të LSI dhe opozitës së bashkuar për ta përmbyllure këtë reformë dhe njëherazi për t’i hapur rrugë zbatimit te saj, ashtu sikurse përcaktohet edhe nga Bundestagu Gjerman”, thuhet njoftimin e LSI-së.
Ndërkaq pas këtij takimi, LSI-ja duket se i ka përqendruar sulmet ndaj kryeministrit Edi Rama, duke i kujtuar ambasadës amerikane qëndrimet e liderit të mazhorancës së majtë kundër presidentit amerikan Donald Trump.
Pikërisht nënkryetari i LSI-së, Petrit Vasili në një postim në rrjetet sociale publikonte videon e qëndrimeve të Ramës ku shpreh se nuk dëshironte që Trump të zgjidhej si president, duke i drejtuar tre pyetje.
“A është Edi Rama një qytetar si gjithë të tjerët për SHBA. A ka ndonjë status të privilegjuar Edi Rama në SHBA, që shqiptarët nuk e dinë? Po një qytetari të thjeshtë shqiptar a do t’i lejoheshin këto skandale, që lidhen me SHBA, pa i hyre një gjemb në këmbë ashtu si Edi Ramës? Jam i interesuar unë, por edhe të gjithë shqiptarët që të dëgjojmë shpjegimet e detyruara të Ambasadës, të cilat mungojnë të jepen prej vitesh”, ishte postimi i Vasilit i publikuar në orën 11:00 në rrjetet sociale. Ndërsa takimi mes Kryemadhit dhe ambasadores Yuri Kim dhe Kryemadhi nisi në orë 11:30 e zgjati deri në ora 13:00.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje