.png)
Partia Demokratike akuzon Qeverinë për fryrje artificiale të vlerës me të cilën blen kitet për testimet e koronavirusit dhe për klasifikimin si sekret shtetëror të tenderave për blerjen e këtyre kiteve.
“Të dhënat e siguruara faktojnë se kitet për testimin e një personi vijnë në Shqipëri me çmimin e tregut 21 mijë lekë të vjetra, ndërsa Qeveria vetëm pak orë më vonë, i blen ato me 85 mijë lekë të vjetra. Nga 21 mijë lekë që e kanë çmimin maksimal në treg, qeveria blen 85 mijë lekë një kit testimi. Pra, tenderi sekret është përdorur për të blerë këto pajisje mjekësore me çmim 4 herë më të lartë. Të blesh 4 herë më shtrenjtë një testim, do të thotë 4 persona më pak të testuar”, deklaroi ish-deputeti demokrat, Enkelejd Alibeaj.
Opozita thotë se ky është krim i dyfishtë dhe kërkon publikimin e kontratave sekrete dhe anulimin e çmimeve të blerjes së kiteve.
“Ky është krim dhe kur krimin përpiqesh ta fshehësh me kontrata sekrete apo me mungesë transparence, ai bëhet edhe më i rëndë, sepse provon që është bërë me vetëdije për të vjedhur. Abuzime kaq të mëdha me taksat e shqiptarëve provojnë edhe një herë se Edi Rama ka para në buxhet, por këto para i ka për t’i vjedhur, i ka për t’i ndarë me klientët e tij të preferuar. Në vend që të sulmojë opozitën, Edi Rama duhet urgjentisht të bëjë 2 gjëra për të zhbërë vjedhjen; të publikojë kontratat sekrete dhe t’i anulojë çmimet e tyre skandaloze!
Thellohet skandali i vjedhjes me tenderat sekretë. Një testim blihet nga qeveria 4 herë më shtrenjtë se çmimi i tregut.
Më herët, PD ka denoncuar tenderin për 200 mijë maska, që sipas opozitës janë blerë 2-3 herë më shumë se çmimi i tregut përmes një kontrate edhe ajo e mbajtur sekret. Një ditë më parë, Sekretari i Përgjithshëm i PD-së, Gazmend Bardhi tha se opozita do të publikojë në ditët në vijim skandalet me tenderat e klasifikuar si sekret shtetëror.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje