.png)
Ambasada Amerikane në Tiranë ka dhënë detaje mbi takimin e ambasadores Yuri Kim me kryeministrin Edi Rama të zhvilluar sot pas situatës së fundit të krijuar pas shembjes së Teatrit Kombëtar e protestave të nisura për këtë shkak.
Në një postim në Facebook, Ambasada e SHBA-ve thekson se gjatë bisedës me kreun e qeverisë shqiptare, ambasadorja Kim ka theksuar rëndësinë që ka gjithëpërfshirja dhe diskutimet e mirëmenduara në qeverisje, në përputhje me statusin e Shqipërisë si anëtare e NATO-s dhe vend që synon anëtarësimin në BE.
“Ata u pajtuan se është thelbësore që Shqipëria të vijojë në rrugën e saj drejt arritjes së dakortësisë për reformën zgjedhore dhe masave të tjera që u janë premtuar qytetarëve të Shqipërisë. Ambasadorja Kim do të takohet edhe me kreun e PD-së Basha së shpejti”, thekson njoftimi i ambasadës. Pas takimit me Ramën në kryeministri, ambasadorja Kim pritet të takohet edhe me kreun e opozitës, Lulzim Basha.
Ndërkohë që Kim dhe Rama diskutonin mbi ngjarjet e fundit, Parti Socialiste Europiane ka bërë thirrje që Teatri Kombëtar të mos përdorej për qëllime politike.
“Vendimi mbi fatin e kësaj ndërtese problematike ka qëndruar në duart e qeverive shqiptare për të gjitha vija politike për 22 vjet. Qeveria aktuale socialiste e Edi Ramës ka marrë përgjegjësinë dhe ka vepruar. PES është informuar se ndërtesa konsiderohet e rrezikshme nga ekspertët e sigurisë. Planet për ndërtimin e një teatri të ri modern janë në lëvizje, pas një seri konsultimesh publike dhe transparente”, thuhet në një njoftim zyrtar të partisë.
Presidenti i PES Sergei Stanishev ngre shqetësimin se përdorimi i situatës rreth ndërtesës për të përhapur ndarjen dhe polemikat midis qytetarëve shqiptarë është thellësisht shqetësuese. “Kohët e fundit Shqipëria ka bërë përparim të rëndësishëm në rrugën e saj drejt integrimit evropian, të cilin ne e mbështesim plotësisht. Përpjekjet e disa forcave politike për të shfrytëzuar këtë rast dhe për të inkurajuar përshkallëzimin e tensioneve nuk do të sjellin mirë as për artistët interpretues në Shqipëri, as për qytetarët e tij”, thotë Stanishev.
Në lidhje me të drejtat e qytetarëve për të demonstruar PES, bën thirrje për një fund demokratik dhe paqësor të krizës së Teatri Kombëtar dhe kundërshton të gjitha nxitjet për të pushtuar prona publike dhe sabotim të punëve publike.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje