.png)
Valencia kërkon nga UEFA të nisë një hetim për trajnerin e Atalantës, Xhanpiero Gasperini. Lajmi bëhet i ditur nga “Marca”, që shpjegon se Gasperini është vënë në shënjestrën e klubit spanjoll pas rrëfimit të tij se ishte prekur nga koronavirusi në kohën kur u luajt ndeshja e Ligës së Kampionëve me Valencian, më 10 mars. Ana Barcelò, përgjegjëse e departamentit sanitar të Valencias, e ka quajtur të papërgjegjshme sjelljen e Gasperinit.
Pasi publikoi një komunikatë që censuronte fjalët e trajnerit të Atalantës, Valencia tani kërkon hetim nga UEFA, sepse, nëse do të dihej që trajneri italian kishte simptoma të Kovid-19 në atë kohë, skuadra duhej të ishte karantinuar sipas protokollit dhe nuk do të kishte zbritur në fushë.
Gjithçka vjen pas deklaratave të Gasperinit për simptomat që kishte para ndeshjes në “Mestalla”, më 10 mars. Atalanta fitoi 4-3 në ndeshjen e kthimit të fazës së 1/8-ve dhe siguroi kualifikimin historik në çerekfinale të Ligës së Kampionëve. Pas asaj ndeshjeje, te Valencia rezultuan pozitivë 10 lojtarë dhe 15 punonjës të klubit. Sipas klubit të Valencias, Gasperini ka vënë në rrezik shëndetin e personave të tjerë me gjendjen e tij para dhe gjatë ndeshjes.
Disa ditë më parë trajneri itlian zbuloi se nuk ishte ndjerë mirë ditën para ndeshjes. “Në stol nuk ndihesha mirë, ndërsa dy netët e ardhshme kam fjetur pak. Ndihesha copë-copë, sikur e kisha temperaturën 40”, – ka deklaruar Gasperini mes të tjerash.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje