.png)
Aritmetika bën zyrtar titullin kampion të Liverpulit. Të kuqtë janë kampionët e rinj të Anglisë edhe pa luajtur, me 86 pikë në 31 javë, me 28 fitore, 2 barazime dhe vetëm 1 humbje. Mançester Siti duhej të fitonte në fushën e Çelsit për të mbajtur gjallë garën, por ka humbur 2-1 dhe kështu Liverpuli i jep fund “agjërimit” 30-vjeçar.
Për herë të parë që prej vitit 1990, Liverpuli ngjitet në çatinë e futbollit anglez. Pak më shumë se 30 vjet pritje, saktësisht 11016 ditë. Ka kaluar shumë kohë nga 28 prilli i 1990-ës deri më 25 qershor 2020. Një interval i gjatë 1573 javë, ku Liverpulit i ka munguar titulli kampion në Angli. Ky ishte sezoni i duhur, u duk që në javët e para të kampionatit. Skuadra e trajnerit Jurgen Klop ka bërë një sezon të shkëlqyer, edhe pse pandemia e Koronavirusit që gjunjëzoi gjithë botën, goditi edhe futbollin.
Ishte viti perfekt për Liverpulin, që ndërtoi një skuadër model. Suksesi nisi në qershor të 2019-ës, me fitimin e Ligës së Kampionëve, për të vazhduar me Superkupën e Europës dhe Botërorin e Klubeve. Kishte mbetur vetëm titulli kampion, që tashmë është bërë realitet. I shkoi shumë afër sezonin e shkuar, por u mposht nga Mançester Siti, me 1 pikë më shumë, 98 skuadra e Guardiolës dhe 97 ajo e Klop. Këtë herë Liverpuli ishte i papërmbajtshëm dhe krijoi një distancë prej 25 pikësh nga Siti.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje