.png)
Nëse sot do të ishte data 15 qershor, ende pa u zyrtarizuar nisma e ndryshimeve kushtetuese, përgjigja përmes emailit e Partisë Demokratike ndaj ftesës së PS-së për tu mbledhur në Këshillin Politik do të kishte shumë më kuptim, sesa sot kur situata është krejt tjetër. Pse?
Sepse Partia Demokratike, përmes Oerd Bylykbashit, i ka kthyer përgjigje PS-së për një mbledhje Këshilli me dy kthesa të mëdha.
Së pari; PD kërkon të mbledhë Këshillin Politik, jo sot, por nesër pas kalimit në Kuvend të marrëveshjes së 5 qershorit.
Së dyti; PD-ja pranon ftesën me një axhendë krejt ndryshe, jo për ndryshimet kushtetuese që ka propozuar PS-ja përmes Damian Gjiknurit, por për masat shtesë që lidhen me marrëveshjen e 5 qershorit.
“Në Rendin e Ditës së mbledhjes siç kemi rënë dakord në Marrëveshjen e 5 Qershorit, duhet të përfshihet vijimi i punës së Këshillit për zbatimin e pikave 11 dhe 12 të saj, ku specifikohet se: “11. Masat shtesë: Këshilli Politik do të vazhdojë të diskutojë në mirëbesim dhe të përpiqet të arrijë zgjidhje të përbashkëta ku dhe kur është e mundur të adresohen rekomandimet kryesore të ODIHR lidhur me: (1) blerjen e votës; (2) presionin ndaj votuesve dhe administratës publike; (3) keqpërdorimin dhe abuzimin me administratën publike; (4) marrëveshjet e fshehta me grupet kriminale; (5) lirinë dhe sekretin e votës; dhe (6) manipulimin dhe falsifikimin e rezultateve zgjedhore.
Në rast të mos progresit këto propozime NUK do të ndërhyjnë apo vonojnë një marrëveshje dhe kalimin në parlament të masave të dakordësuara në pikat 1-9…”, thuhet në përgjigjen e Bylykbashit për Damian Gjiknurin.
Ky i fundit ka kthyer përgjigje duke u fokusuar tek ajo për të cilën Rama prej 24 orësh kërkon takim; ndryshimet kushtetuese.
“Jemi dakord të takohemi edhe të enjten edhe të premten dhe në çdo kohë që ju e gjykoni të arsyeshme sepse koha është shumë e çmuar në kushtet kur Kuvendi ka një vendimmarrje të rëndësishme në 30 Korrik. Këtu nuk bëhet fjalë thjesht për çështjet e mbetura po për një çështje shumë konkrete, prandaj edhe njëherë ju lutem të konfirmoni praninë tuaj për sot në orën 17:00 pasi opozita parlamentare e ka konfirmuar ndërkohë.
Duke shpresuar në mirëkuptimin tuaj ju mirëpresim në ora 17:00”, shkruan Gjiknuri.
I kundërpërgjigjet PD-ja përmes një njoftimi zyrtar ku konfirmon praninë e saj vetëm nesër, ose të premten, sipas axhendës që ajo publikoi më herët dhe jo asaj qe kembengul PS-ja.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje