.png)
Bashkimi Europian vendosi ditën e mërkurë që të mos njohë zgjedhjet presidenciale të 9 gushtit në Bjellorusi, ku Presidenti, Aleksandër Lukashenko u shpall fitues me mbi 80 për qind të votave.
“Këto zgjedhje nuk ishte as të lira dhe as të drejta dhe nuk plotësuan standardet ndërkombëtare”, tha Presidenti i Këshillit Europian, Charles Michel.
Deklarata e Michel u bë në përfundim të një samiti urgjent të zhvilluar përmes një telekonference të ministrave të Jashtëm të BE-së.
Presidenti i KE paralajmëroi se Brukseli nuk do të mjaftohet vetëm me mosnjohjen e zgjedhjeve.
“Shumë shpejt do të njoftohen sanksionet ndaj një numri zyrtarësh dhe individësh përgjegjës për dhunën, raprezaljet ndaj qytetarëve dhe mashtrimin elektoral”, tha Michel.
Në këndvështrimin e BE-së, protestat në Bjellorusi nuk mund të trajtohen si përplasje gjeopolitike me Rusinë.
“Në radhë të parë kjo krizë është kombëtare dhe ka të bëjë me të drejtën e qytetarëve për të zgjedhur në mënyrë të lirë dhe të ndershme udhëheqësit e tyre. Ne qëndrojmë të palëkundur pas të drejtës së popullit bjellorus që të vendosë vetë për fatin e tij”, u shpreh Michel.
Protestat janë përshkallëzuar ditët e fundit, kur punonjës të fabrikave të mëdha shtetërore kanë braktisur vendet e tyre të punës dhe u janë bashkuar qytetarëve të tjerë në rrugët dhe sheshet e vendit.
Këto zhvillime detyruan Presidentin Lukashenko, që drejton vendin me dorë të hekurt prej thuajse 3 dekadash, që të propozojë menjëherë zhvillimin e zgjedhjeve të reja, por me kusht që më parë vendi t’i nënshtrohet ndryshimeve kushtetuese.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje