.png)
Rusia ka humbur terren në dekadat e fundit në tregun e shitjes së armëve tek Qeveritë, sidomos në Lindjen e Mesme, për shkak se gjithnjë e më shumë këto vende po zgjedhin armët amerikane, ose europiane që janë më të lehta dhe me saktësi më të madhe, pavarësisht kostos më të lartë.
Edhe krenaria e flamuri i rusëve në këtë sektor, “Kallashnikovi” nuk po gjen më tregjet që ka pasur vite më parë. Për t’iu përshtatur kërkesave të reja të tregut, kompania ruse “Kalashnikov Concern” prezantoi modelin e ri të armës më të shitur në botë.
Bëhet fjalë për një ndryshim madhor. Arma e re, e pagëzuar me emrin AK-19 (AK në nder të projektuesit fillestar të armës, Aleksandër Kallashnikov dhe 19 për vitin e prodhimit 2019), që plotëson edhe parametrat e NATO-s me predha 5.56×45 mm.
AK-19 u prezantua në panairin “Army 2020 në Moskë. Synimi i kompanisë është që të pushtojë tregjet e vendeve arabe, që nga Mbretëria Saudite, apo Emirateve të Bashkuara Arabe, aktualisht të dominuara nga prodhuesit amerikanë dhe europianë.
Por, kreu i kompanisë, Dmitry Tarasov nuk përjashtoi mundësinë që kontrata shitjesh të nënshkruhen edhe me vende të NATO-s, nëse këto të fundit janë dakord. Ajo që ofron Kallashnikovi i ri, sipas rusëve, është saktësia në qitje si e M4 e famshme amerikane, HK416 gjermane dhe FN SCAR belge, me peshë më të lehtë, por me çmim shumë herë më të lirë.
FN SCAR belge 
HK416 gjermane 
M4 amerikane
“Armët me predha 5.56×45 milimetra janë më populloret në botë. Kjo na jep akses tek qindra tregje që aktualisht përdorin pushkët e NATO-s. Tani mund të marrim pjesë në tendera dhe të bëjmë ofertën tonë, që është më e arsyeshme (financiarisht) se rivalët tanë, por edhe duke i rivalizuar në cilësi”, tha një zëdhënës i kompanisë.
Modeli i ri i Kallashnikovit në pamje të parë nuk ndryshon shumë në krahasim me modelin AK-12, që aktualisht përdoret nga ushtria ruse. Dallimi qëndron në detaje. AK-19 ka predha më të vogla, peshë më të lehtë dhe rrjedhimisht edhe rrezen vdekjeprurëse më të vogël, që shkon deri në 250 metra, 50 metra më pak se AK-12.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje