.png)
Me ndeshjen Fulham-Arsenal, e programuar për nesër në orën 13:30, nis zyrtarisht kampionati i ri Premier Ligës. Sigurisht, luhet me dyer të mbyllura. Kompanitë e basteve shohin si favorit për titullin kampion Mançester Sitin, pastaj me radhë Liverpuli kampion në fuqi, Mançester Junajtid, Çelsi dhe Arsenali.
Fuqia e jashtëzakonshme ekonomike që ka Mançester Siti i ka shtuar ndjeshëm shanset për fitimin e titullit nga “qytetarët”, duke lënë pas Liverpulin e Jurgen Klop. Pep Guardiola ka shpenzuar 60 milionë për të forcuar mbrojtjen: nga Burnemuthi ka marrë Nathan Akè dhe nga Valencia Ferran Torres. Ditët e fundit Rijad Mahrez dhe Aimerik Laporte kanë rezultuar pozitivë me Koronavirus, por duhet të jenë gati për ndeshjen e së hënës me Volverhempton.
Në pritje të Tiago Alkantarës, i kërkuar me ngulm nga Jurgen Klop, por ende larg lamtumirë nga Bajern Mynih, deri tani kampionët janë mjaftuar me blerjen e mbrojtësit të majtë të Olimpiakosit, Konstantinos Tsimikas, për 13 milionë euro. Për këtë arsye Siti konsiderohet favorit në raport me Liverpulin. Kandidati i tretë në luftën për titull është Çelsi i Frenk Lampard, që ka shpenzuar më shumë në merkaton verore, duke marrë Ben Çiluell nga Leiçesteri, Hakim Ziesh nga Ajaksi, Tiago Silvën nga PSG-ja dhe gjermanin Timo Verner, për të cilin u paguan te Lajcigu 55 milionë euro.
Me ambicie e nis sezonin edhe Evertoni i Karlo Ançelotit, që ka bërë dy goditje të rëndësishme, kolumbianin Hames Rodriguez dhe brazilianin Alan. Totenhem-Everton është kryendeshja e javës së parë të kampionatit. Ançeloti sfidon Mourinjon në një ndeshje, ku faktori fushë është thelbësor, duke parë që 5 nga 7 ndeshjet e fundit i kanë fituar Spërsat. Nga java e parë janë shtyrë ndeshjet Bërnli-Mançester Junajtid dhe Mançester Siti-Aston Vila, për shkak të impenjimeve europianë të skuadrave të Mançesterit.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje