.png)
Eden Hazard në verën e 2019-ës la Çelsin dhe kaloi te Reali i Madridit, ku do të zëvendësonte Kristiano Ronaldon. Por futbollisti i kombëtares belge nuk pati impakt në kampionatin spanjoll për shkak të dëmtimeve të njëpasnjëshme. Për asnjë moment ai nuk ka mundur të jetë i rëndësishëm për madrilenët.
Edhe kur dukej se sulmuesi anësor, i datëlindjes 1991, do të ishte gati për trajnerin Zinedin Zidan, ja ku vjen edhe dëmtimi i radhës, i shtati për të që nga koha kur ndodhet te Reali. Një tjetër problem fizik e ka ndalur Hazardin, i cili ka ndjerë një shqetësim në këmbën e djathtë dhe pas analizave të para të mjekëve duket se bëhet fjalë për një ndalesë prej 3-4 javësh. Shtypi spanjoll shkruan se deri tani Hazard ka kaluar 213 ditë të eksperiencës së tij te Reali në rehabilitim.
Me dëmtimin e fundit, belgu ka vënë në dyshim edhe praninë në “El Clasico”. Këtë radhë të paktën shpresohet që ai t’i japë fund mallkimit të dëmtimeve dhe të kthehet në një faktor të rëndësishëm për Realin. Madrilenët mundën 1-0 Valadolidin të mërkurën në mbrëmje dhe pas tri javësh kampionat, kanë 7 pikë në renditje. Skuadra e Zidan mban vendin e tretë, pas Getafes dhe Valencias, që janë në të njëjtën kuotë pikësh.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje