.png)
Diego Armando Maradona është shtruar në spital me shenja depresioni tri ditë pas përvjetorit të 60-të të lindjes. Një pjesëtar i stafit të ish-futbollistit të famshëm argjentinas ka deklaruar se gjendja e tij nuk është e rëndë.
“Është shumë i trishtuar që prej një jave dhe nuk ka dëshirë të hajë ushqim”, – ka thënë pjesëtari i stafit të Maradonës, duke shtuar se mjeku personal i “Pibe de oro”, Leopoldo Luque, e ka çuar në spital për t’i bërë të gjitha kontrollet.
Kampioni i botës me Argjentinën në vitin 1986 është shtruar në një klinikë private në La Plata, rreth 40 kilometra në jug të Benos Airesit. Maradona jeton aty që nga fundi i vitit të kaluar, kur mori detyrën e trajnerit të skuadrës së divizionit të parë, Gimnasia. Ish-numri 10 i Argjentinës dhe Napolit festoi 60-vjetorin të premten dhe atë ditë ishte në stol për ndeshjen e kampionatit ndaj Patronato, ku skuadra e tij fitoi 3-0.
Maradona u largua para se të përfundonte pjesa e parë, duke ngritur dyshime për shëndetin e tij. Mjeku Luque ka mohuar faktin e infektimit nga Covid-19. Ish-kampioni u izolua në shtëpi për disa ditë, pasi një person me të cilin punon shfaqi sintomat e sëmundjes. “Nuk kishte forcë, ndërsa ditëlindja ishte një faktor që e ka rënduar në disa aspekte, – ka thënë mjeku. – Ideja ime është që duhet të hidratuar për tri ditë, të shohim reagimin dhe ta kurojmë. Nuk është situatë emergjente”.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje