.png)
Java e parë e Superiores u mbyll me ndeshjet Vllaznia-Apolonia 2-0 dhe Teuta-Skënderbeu 1-1, ku një gjysmë surprize e kanë bërë korçarët me pikën e marrë në stadiumin “Niko Dovana”. Shkodranët kanë marrë 3 pikët e para, duke i bërë një nisje të mirë kampionatit, edhe pse me shumë fat.
Sfidën e dy trajnerëve të huaj në “Loro Boriçi” e ka fituar ai i Vllaznisë, Tomas Bërdariç, i cili ka triumfuar përballë Apolonisë së drejtuar nga italiani Xhovani Kolela. Ndeshja u zhbllokua në pjesën e dytë nga Dilaver, të cilit iu përplas topi në këmbë në zhvillimet e një goditjeje nga këndi. Golin e sigurisë për shkodranët e shënoi Dunga, edhe ky lojtar i ri në radhët e Vllaznisë, që premton për një sezon pozitiv pas kësaj nisjeje të mbarë.
Teuta, një skuadër pretendente këtë kampionat, nuk shkoi më shumë se barazimi ndaj Skënderbeut që ka një përbërje krejt ndryshe, larg asaj të sezoneve të fundit. Durrsakët e gjetën golin shumë shpejt me Rubin Hebajn, i cili devijoi me kokë një top të krosuar nga këndi. Gjithçka u komplikua për Teutën nga një gafë e portierit Frashëri, i cili goditi një shok skuadre në tentativë për të larguar topin, duke i dhënë mundësinë e barazimit Meksit. Barazimi është një rezultat që kënaq ekipin korçar, ndërsa Teuta “qan” dy pikët e humbura.
Renditjen e kryesojnë Tirana, Vllaznia dhe Kastrioti, që kanë shënuar nga 2 gola në ndeshjet e sotme dhe kanë marrë tri pikët e para. Zhgënjimet më të mëdha në startin e Superiores ishin Partizani, Kukësi dhe Teuta.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje