.png)
Probleme për Real Madridin para ndeshjes të së mërkurës me Interin në Ligën e Kampionëve. Trajneri Zinedin Zidan duhet t’i bëjë llogaritë pa kapitenin Serxho Ramos, i cili pësoi një dëmtim me Spanjën në sfidën ndaj Gjermanisë, në Ligën e Kombeve.
Mbrojtësi, sipas analizave të fundit, ka një dëmtim muskulor në tendinën e gjurit të djathtë dhe sipas të gjitha gjasave nuk do të jetë i disponueshëm për ndeshjen me Interin javën e ardhshme. Ramos u dëmtua në pjesën e parë të ndeshjes ndaj Gjermanisë. Ai ndjeu dhimbje dhe kërkoi menjëherë ndërrim, kur rezultati ishte 3-0 në favor të Spanjës.
Te Reali janë të ndërgjegjshëm se pa kapitenin do ta kenë shumë të vështirë në “San Siro”. Mungesa e tij rëndon shumë, e tregojnë qartë edhe shifrat. Në 8 ndeshjet e fundit të Ligës së Kampionëve, ku numri 4 i madrilenëve ka munguar, skuadra ka humbur 7 herë. Kuptohet qartë se sa i rëndësishëm është Ramos për Realin në ndeshje të tilla.
Por më e keqja është se Zidan ka edhe probleme të tjera në mbrojtje. Gjatë ndeshjes Francë-Suedi, trajneri Deshamp e ndërroi pas pjesës së parë Rafel Varan, mbrojtësin tjetër të qendrës së Realit. Varan mori një goditje në shpatull gjatë një dyluftimi ajror. Francezi pritet të jetë i gatshëm ndaj Interit, por me siguri nuk do të jetë në 100% të formës së tij. Eden Hazard dhe Militao ndërkohë kanë rezultuar negativë dhe do të jenë në dispozicion të trajnerit Zidan ndaj Interit.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje