.png)
Janë luajtur vetëm 5 javë nga kampionati i Superiores dhe janë 3 tashmë trajnerët që janë larguar. Ndoshta mund të jetë një rekord ky për nivelin elitar të futbollit shqiptar. Pas Emanuel Egbo te Tirana dhe Armando Cungut te Laçi, është larguar edhe italiani i Apolonisë, Xhovani Kolela.
Një ditë pas humbjes tenistike me Laçin, 6-1, ai ka dhënë dorëheqjen dhe drejtuesit e klubit fierak e kanë pranuar. Drejtimin e skuadrës e ka marrë përkohësisht Nikolin Çoçlli, deri tani ndihmës i Kolelës. Apolonia nuk ka bindur në këto javë të para, nuk ka fituar ende asnjë ndeshje dhe qëndron në vendin e fundit të tabelës së renditjes.
Kolela erdhi në Fier për një rol drejtuesi tek Apolonia, por me largimin e Artan Mërgjyshit, i cili e ngjiti këtë skuadër në Superiore, ai mori rolin e trajnerit. Një detyrë që e mbajti vetëm 5 javë, për t’i lënë tashmë vendin një tjetër trajneri. Ndoshta klubi mund t’i besojë Çoçllit, nëse skuadra ka ecuri të mirë. Trajneri kryeqytetas ka drejtuar më parë Luftëtarin në Superiore. Ndeshjen e radhës Apolonia e ka me Kukësin në transfertë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje