.png)
Presidenti Ilir Meta ka thirrur në një takim Ambasadorin e OSBE-së në Tiranë, Vincenzo del Monaco dhe Ambasadorin e BE-së në Tiranë, Luigi Soreca për t’u ngritur si shqetësim domosdoshmërinë e shtyrjes së vlefshmërisë së kartave të identitetit që kanë skaduar dhe skadojnë deri më 30 prill, për t’u dhënë mundësi qytetarëve që të votojnë.
“I informova rreth takimit, që zhvillova me shoqërinë civile për problematikat, që lidhen me procesin zgjedhor, përfshirë shtyrjen e afatit të kartave të identitetit dhe mundësimin e votimit për shtetasit e prekur nga COVID-19”, thuhet në deklaratën e Metës.
Presidenti shprehet se u ka theksuar ambasadorëve se do të ketë zero tolerancë ndaj çdo tentative për intimidimin, presionin dhe pengimin e pjesëmarrjes masive të qytetarëve në zgjedhje.
“Çdo individ, që do të përfshihet në skema të krimit zgjedhor, do të ndëshkohet me forcën më të rreptë të ligjit”, deklaron Meta.
Në fund, Meta vlerëson mesazhin e BE-së për hetimin e dosjeve të krimit zgjedhor 184 dhe 339, bëri thirrje që të mos ketë amnisti për këto krime dhe paralajmëroi se kushdo që synon t’i përsërisë këto krime më 25 prill nuk do të amnistohet.
“Zgjedhjet e 25 prillit do të vendosin për fatet e Shqipërisë dhe të ardhmen e saj të pakthyeshme europiane”, mbyll reagimin e tij kreu i shtetit.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje