.png)
Presidenti i Rusisë, Vladimir Putin, mori vaksinën kundër koronavirusit dhe ndihet mirë, njoftoi Kremlini, transmeton agjencia ruse e lajmeve RIA.
Më herët, Kremlini tha se ka vendosur qëllimisht që të mos e zbulojë emrin e vaksinës së prodhuar në Rusi, që Putin ka zgjedhur të marrë.
Në Rusi ka hezitim të madh për vaksinimin kundër koronavirusit.
Deri më tani, vetëm 4.3 milionë rusë i kanë marrë dy doza të vaksinës, që do të thotë më pak se 5 për qind e popullsisë 146-milionëshe.
Rusia ka numrin e katërt më të lartë në botë të infektimeve me koronavirus: mbi 4.4 milionë.
Numri i viktimave atje është mbi 94,000.
Rusia ka zhvilluar tri vaksina kundër koronavirusit: Sputnik V, EpiVacCorona dhe CoviVac.
Ajo ka miratuar Sputnik V-në në muajin gusht, duke u bërë vendi i parë në botë me vaksinë kundër koronavirusit.
Kjo ka bërë që shkencëtarët në gjithë botën të vënë në dyshim sigurinë dhe efikasitetin e saj, pasi ajo është regjistruar përpara se studimet e fazës së tretë të testimit të bëheshin të disponueshme.
Por, në fillim të shkurtit, rezultatet e testimeve të publikuara në revistën globale mjekësore Lancet, kanë treguar se Sputnik V – vaksinë që jepet në dy doza – është 91.6 për qind efektive kundër koronavirusit.
Edhe dy vaksinat tjera ruse, EpiVacCorona dhe CoviVac, kanë marrë miratimin e rregullatorëve shëndetësorë përpara se të përfundonin testimet e fazës së fundit. (REL)
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje