.png)
Qytetet gjermane të Berlinit dhe Mynihut ndaluan sot përdorimin e vaksinës AstraZeneca tek personat nën 60 vjeç, për shkak të raporteve se vaksina shkakton mpiksje gjaku.
Rregullatori gjerman i ilaçeve, Instituti Paul Ehrlich, tha të martën se ka zbuluar 31 raste të mpiksjes së gjakut, të njohur si trombozë e venave të sinusit cerebral, në mesin e afro 2.7 milionë njerëzve që kanë marrë vaksinën AstraZeneca në Gjermani.
Pothuajse të gjitha rastet janë gra të moshës së re dhe të mesme.
“Ne jemi duke ndaluar vaksinimet me AstraZeneca për personat nën 60 vjeç”, tha ministri i Shëndetësisë në Berlin, Dilek Kalayci.
Kanadaja gjithashtu pezulloi përdorimin e AstraZeneca-s te personat nën 55 vjeç. Njësoj edhe Franca.
Kompania anglo-suedeze AstraZeneca, e cila ka zhvilluar vaksinën në bashkëpunim me Universitetin e Oksfordit, tha se rregullatorët ndërkombëtarë kanë konstatuar se përfitimet e vaksinës janë më të mëdha se rreziqet.
“Ne do të vazhdojmë të punojmë me autoritetet gjermane për të adresuar çdo pyetje që mund të kenë”, tha AstraZeneca.
Këtë muaj, disa vende në Europë kanë pezulluar tërësisht përdorimin e AstraZeneca-s, pas raporteve se disa persona kanë pësuar mpiksje gjaku, pasi janë vaksinuar.
Agjencia Europiane e Barnave, pas një rishikimi të vaksinës, ka konstatuar se ajo është e sigurt dhe efektive dhe përdorimi i saj ka rinisur.
Në Mbretërinë e Bashkuar janë dhënë 11 milionë doza të AstraZeneca-s dhe autoritetet kanë raportuar për pesë raste të mpiksjes së gjakut – njëri prej tyre fatal.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje