.png)
Dy penallti nuk e kanë ndihmuar Shkëndijën e Tetotës për të kaluar në fazën e grupeve të Europa League. Skuadra tetovare është mundur edhe në ndeshjen e kthimit nga Rozenborgu, me rezultatin 0-2, duke bërë që rezultati i përgjithshëm të shkojë në 1-5 në favor të norvegjezëve, që një javë më parë fituan 3-1 në fushën e tyre. Mbetet sërish një “mision i pamundur” kalimi i Shkëndijës në fazën e grupeve.
Sulmuesit Besart Ibraimi dhe Izair Emini humbën secili nga një penallti dhe kjo e penalizoi shumë skuadrën nga Tetova. I pari gaboi në pjesën e parë, kurse i dyti në fillim të pjesës së dytë, kur rezultati ishte ende 0-0. Nëse do të shënonin, loja do merrte rrjedhë tjetër. Më pas norvegjezët shënuan dy herë në portën e Zahov, me anë të Hovland dhe Reginiusen. Ndoshta ngarkesa psikologjike ka bërë të vetën në ndeshjen e zhvilluar në stadiumin e Shkupit. Shkëndija nuk ia ka dalë edhe këtë herë të shkojë më tej. Skuadra është dobësuar këtë verë, pas largimit të ish-kapitenit Hasani, por edhe të Cuculit dhe ndonjë lojtari tjetër.
Në Europa League nuk ka luajtur mbrëmë asnjë futbollist shqiptar. Ata kanë qenë në stol, apo edhe nuk janë grumbulluar fare për këto ndeshje. Atalanta e Berishës dhe Gjimshitit është eliminuar pas gjuajtjeve të penalltive në Danimarkë ndaj Kopenhagenit, pasi edhe ndeshja e kthimit u mbyll pa gola 0-0. Në portën e Atalantës ishte sërish Golini dhe Berisha nuk luajti asnjë minutë, ashtu si Gjimshiti. Është kualifikuar në fazën e grupeve Karabaku i Ansi Agollit, por mbrojtësi shqiptar qëndroi në stol. Skuadra azere mundi 3-0 Sherif Tiraspolin.
Asnjë minutë edhe për Taulant Xhakën e rikthyer nga dëmtimi në humbjen 1-0 me qipriotët e Apollonit. Bazeli u eliminua, pasi fitorja në ndeshjen e parë nuk i mjaftoi. Malmoe e Egozon Binakut kaloi më tej, pas fitores 0-2 në fushën e Mydtjyllandit, por mbrojtësi kuqezi nuk ishte fare i grumbulluar, ashtu si Kameer Qaka me Steauan e Bukureshtit, që fitoi 2-1 ndaj Rapidit të Vjenës, por u eliminua. U kualifikua ndërkohë skuadra e re e Eros Grezdës, Gllasgou Rejnxhërs.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje