.png)
Tani nuk ka më asnjë dyshim. Vllaznia ka fitur zyrtarisht të drejtën për të luajtur në Kupat e Europës në sezonin 2021-2022. Lajmin e ka bërë të ditur kryebashkiakja e Shkodrës, Voltana Ademi, e cila shkruan në faqen e saj zyrtare se Vllaznia është licencuar për të luajtur në Europë.
“Dua të ndaj me të gjithë një lajm fantastik: Ekipet e Vllaznisë të vajzave dhe djemve janë licencuar për pjesëmarrjen në Kupat e Europës. Është kurorëzim i përpjekjeve të përbashkëta të disa faktorëve, të cilët dua t’i falënderoj me zemër. Pavarësisht pengesave, të gjithë bashkë ne i kapërcyem ato, duke plotësuar kriteret e licencimit të vendosura nga UEFA”, – shkruan Ademi.
Drejtuesit e klubit shkodran kanë arritur kështu të zgjidhin çështjen e detyrimeve financiare të prapambetura, duke bërë një marrëveshje mes palëve, që i hap rrugën plotësimit të një kriteri të rëndësishëm nga UEFA sa i takon licencimit për në Kupat e Europës. Ky është një problem që shqetëson më së shumti klubet tona, veçanërisht ata që varen nga bashkitë.
Vllaznia tashmë do të jetë edhe më e karikuar për pjesën e mbetur të sezonit, ku është në garë për fitimin e të dy trofeve, titullit kampion dhe Kupës së Shqipërisë. Shanset janë të mëdha që kjo skuadër të luajë në Europë pas shumë vitesh.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje