.png)
Greqia nuk mund të injorojë mospajtimet që ka me Turqinë për çështjet territoriale në Mesdhe dhe për disa tema tjera, mirëpo zgjidhja e problemeve, ndonëse është e vështirë, nuk është e pamundshme, ka thënë ministri i Jashtëm grek, Nikos Dendias për gazetën “Kathimerini”.
Të dyja shtetet janë anëtare të NATO-s, mirëpo nuk pajtohen për një mori çështjesh, duke përfshirë shtrirjen e tyre në Mesdhe, hapësirën ajrore, burimet e energjisë dhe Qipron e ndarë etnikisht. “Nuk është e mundshme që të fshihen pas gishtit çështjet ku kemi qëndrime të ndryshme”, ka thënë Dendias.
Të enjten, Dendias dhe homologu i tij, Mevlut Cavusoglu, kanë pasur përplasje në qëndrime në një konferencë për media në Ankara, e cila ka nisur me shpresat për përmirësim të marrdhënieve, port ë dyja palët kanë përfunduar në akuza ndaj njëri-tjetrit.
Kjo njëherësh ka qenë vizita e parë e një ministri të Jashtëm grek në Turqi, prej vitit 2015.
Dendias i ka thënë gazetës “Kathimerini”, se ndonëse atmosfera në takim ka qenë e mirë, ende nuk është arritur pajtueshmëri në shumë çështje.
“Çështja me të cilën përballemi me Turqinë, është se nuk ekziston asnjë emërues i përbashkët lidhur me kornizën e zgjidhjes së mosmarrëveshjeve tona”, ka thënë ai.
Ai shtoi se qëndrimi i Greqisë është që demarkimi i zonës së vet ekonomike dhe shtrirjes kontinentale me Turqinë në Detin Egje, si dhe në lindje të Mesdheut, duhet të bëhet në bazë të ligjit ndërkombëtar.
Dendias ka thënë se ka ftuar Cavusogloun në Athinë për të vazhduar bisedimet, dhe se sipas tij, ky takim mund të ndihmojë në shtrim të rrugës për takim të kryeministrit grek Kyriakos Mitsotakis me presidentin turk Recep Tayyip Erdogan. /Rel/
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje