.png)
Presidenti Ilir Meta doli në konferencën e radhës të jashtëzakonshme për shtyp, ku shmangu përplasjen e mëtejshme me Ambasadoren e SHBA në Tiranë, Yuri Kim dhe u përqëndrua tek akuzat drejtuar SPAK-ut dhe Prokurorisë së Elbasanit për zvarritje të hetimeve në lidhje me përplasjen me armë të 21 prillit në këtë qytet.
“Meta tha se ka një përpjekje për ta shtyrë hetimin dhe zgjidhjen e kësaj ngjarjeje pas zgjedhjeve, megjithëse provat janë të dukshme. Provat kanë qenë atje në sytë e të gjithëve”, tha ai.
Duke iu referuar një shkrese që PD ka dorëzuar në SPAK që më 7 prill, Meta tha se vrasja në Elbasan mund të ishte parandaluar nëse Prokuroria e Posaçme do të kishte bërë detyrën e saj dhe të kishte nisur hetimet për pretendimet e opozitës.
“Faktet na tregojnë që nëse organi i prokurorisë dhe policia do të kishin vepruar në kohë, edhe ngjarja e Kavajës, edhe ajo e Elbasanit nuk do të kishte ndodhur. Më 7 prill, PD përmes një shkrese ka paraqitur në SPAK një kallëzim penal. Sipas këtij materiali, PD i ka paraqitur SPAK kërkesën për hetimin e 40 shtetasve që në mënyrë të angazhuar blinin vota për partinë në pushtet. Janë emrat e të gjithë atyre të përfshirë në ngjarjen e Elbasanit”, tha Presidenti.
Kreu i shtetit akuzoi SPAK për zvarritje të qëllimshme të hetimeve për këtë denoncim dhe Prokurorinë e Elbasanit për konflikt interesi.
“SPAK, në vend që të hetonte menjëherë vetëm pas 8 ditësh përmes një shkrese të 15 prillit ka shpallur moskompetencën dhe ja ka përcjellë Prokurorisë së Elbasanit. Ka pritur 8 ditë dhe ja ka përcjellë për hetim në Elbasan, ndërkohë që shkresa është bërë hyrje në Prokurorinë e Elbasanit më 19 prill. Kësaj i janë dashur 4 ditë për ta protokolluar këtë shkresë. Prokuroria e Elbasanit, që është në konflikt interesi, ka njoftuar Gazmend Bardhin për të dhënë shpjegime lidhur me kallëzimin që kishte bërë duke i caktuar që të paraqitet në datën 30 prill në orën 10:00, pra pas 10 ditësh dhe pasi të ishin vjedhur zgjedhjet”, u shpreh Presidenti.
Meta iu shmang pyetjes në lidhje me përplasjen e fundit me Yuri Kim. Në vend të Ambasadores së SHBA ai shënjestroi Presidentin serb, Aleksandër Vuçiç.
“Siç e dini ju Presidenti i Serbisë ndërhyri në punët e brendshme të Shqipërisë. Doli me parrullën se Luli është kukull e doktorit. Kishte edhe sondazhe, kuptohet nga Batoni, njeriu më i besueshëm i Beogradit. Nuk impresionohem nga ata lobistë që flasin anglisht dhe mendojnë serbisht për Shqipërinë”, vijoi ai.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje