.png)
Derbi Roma-Lacio nisi pa asnjë futbollist shqiptar në fushë (vetëm kosovari Muriqi titullar), por fati deshi që Marash Kumbulla të hynte që në pjesën e parë, pas dëmtimit të Ibanjez, dhe të shijonte suksesin e parë në një derbi të kryeqyetit. Roma triumfoi 2-0, duke fituar derbin pas 959 ditësh.
Kumbulla ka bërë një paraqitje relativisht të mirë. Mbrojtësi kuqezi është vlerësuar me notën 6 nga specialistët e futbollit në Itali. Tashmë ai po aktivizohet në një mbrojtje me 4 lojtarë, ashtu siç pritet të luajë skuadra me trajnerin e ri Zhoze Mourinjo, i cili nuk nguroi të përcillte komplimentet për fitoren pas derbit. Me siguri portugezi po mban shënime edhe për Kumbullën, ashtu si për të gjithë lojtarët e tjerë.
Tomas Strakosha pritej të kishte një fanellë titullari në derbi, pas paraqitjes së mirë ndaj Parmës, por trajneri Inzagi e ka kthyer në stol, duke i besuar veteranit Reina. Portieri kuqezi nuk është ndjerë mirë, sigurisht, por duhet të respektojë vendimin e stafit teknik, ndërkohë që mundësitë e largimit nga Lacio mbeten të hapura.
Nga futbollistët e Kombëtares, një paraqitje të mirë ka bërë mbrojtësi Ardian Ismajli, titullar në fitoren 4-1 të Specias ndaj Torinos. Një sukses ky që e shpëton skuadrën e futbollistit kuqezi nga rënia nga kategoria. Gjimshiti ishte titullar me Atalantën, si gjithmonë, por këtë herë nuk ishte në nivelin e zakonshëm. Sot është radha e Elseid Hysajt.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje