.png)
Anglia, në grup me Shqipërinë në kualifikueset e Botërorit, po përgatitet për më të mirën në Europian. Ajo ka mundur 1-0 Austrinë në miqësore, pas një pjese të parë me pak emocione, edhe pse në fushë pati luftë sportive. Goli i vetëm u shënua në minutën e 57-të nga Saka, i cili e dërgoi topin në rrjetën e portës së boshatisur. Austria goditi traversën me Sabitzer, ndërsa trajnerin Southgejt e shqetëson dëmtimi i Aleksander-Arnold.
Për t‘u përmendur në miqësoret e tjera është fitorja 3-0 e Francës ndaj Uellsit, kundërshtarit të së shtunës për Shqipërinë në Kardif (miqësore). Për Francën shënuan Mbape, Grizman dhe Dembele, ndërsa Benzema humbi një penallti.
Vetëm barazime për Gjermaninë dhe Holandën. Gjermanët barazuan 2-2 me Danimarkën, ku për skuadrën e Joakim Lëv realizoi Neuhaus dhe për danezët barazoi Polsen. Holanda barazoi 2-2 me Skocinë, të dy golat për “tulipanët” mbajnë autorësinë e sulmuesit Memfis Depai.
Ajo që shqetëson në prag të Euro 2020 ka të bëjë me një episod para ndeshjes Angli-Austri, konkretisht me sjelljen e publikut. Duhej të ishte festë, pasi Anglia kthehej të luante me tifozë (8000 në Riverside Stadium të Midëllesbrout), por ulërimat karshi 22 lojtarëve në fushë, kur ata u ulën në gjunjë në shenjë solidariteti me lëvizjen “Black Lives Matter”, lënë të kuptohet se apelet e vazhdueshme kundër racizmit të çdo forme, nuk janë perceptuar si duhet nga të gjithë. Pas ndeshjes edhe trajneri Southgejt e ngritit këtë shqetësim.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje