.png)
Bashkimi Europian ka shprehur shqetësime rreth përdorimit të raportuar nga Greqia të “bombave” zanore për të parandaluar emigrantët që t’i afrohen kufijve të saj.
Zëdhënësi i Komisionit Europian Adalbert Jahnz tha të enjten se BE kishte vërejtur me shqetësim raportet mediake mbi përdorimin e pajisjeve akustike në kufirin e Greqisë me Turqinë.
Jahnz tha se Komisioni Europian do të “kërkonte informacion nga Athina” në lidhje me përdorimin e këtyre pajisjeve. Ai gjithashtu sugjeroi që përdorimi i teknologjisë mund të jetë në kundërshtim me ligjet e BE mbi të drejtat themelore të njeriut.
Edhe pse tha se u takon vendeve anëtare të BE të vendosin se si të menaxhojnë kufijtë e tyre, trajtimi i emigrantëve “duhet të përputhet me të drejtat themelore europiane, duke përfshirë të drejtën e dinjitetit”.
“Masat për parandalimin e emigrantëve duhet të jenë proporcionale dhe të respektojnë të drejtat themelore, përfshirë të drejtat e azilit,” tha ai, duke iu referuar parimit themelor të së drejtës ndërkombëtare që ndalon vendet të kthejnë azilkërkuesit në vendet ku ata do të përballen me rrezik të mundshëm.
Deklaratat e Jahnz vijnë pasi “Associated Press” raportoi të hënën se zyrtarët kufitarë grekë po përdornin pajisje me zë duke shkaktuar zhurma të forta që janë ta padurueshëm për njerëzit rreth e rrotull, duke i detyruar të largohen.
Pajisja me rreze të gjatë raportohet se mund të lëshojë një zhurmë që është e barabartë me shpërthimin e një makine.
BE e ka cilësuar përdorimin e këtyre pajisjeve “të rrezikshëm, eksperimental dhe diskriminues”. Monitoruesit e të drejtave të njeriut paralajmërojnë se përdorimi i pajisjeve të tilla për të parandaluar kalimin e azilkërkuesve rrezikon t’i kthejë kufijtë europianë në barriera çnjerëzore që i mbajnë njerëzit larg përmes frikës dhe dhunës.
“Largimi i emigrantëve pa u dhënë atyre mundësinë për të aplikuar për azil është i paligjshëm sipas të drejtës europiane dhe ndërkombëtare,” vuri në dukje një organizatë për të drejtat e njeriut, Monitori Europiano-Mesdhetar.
Ai gjithashtu u bëri thirrje udhëheqësve të BE për të siguruar që e drejta për të kërkuar azil të mbrohet.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje