.png)
Trupi i gjetur në brigjet e Norvegjisë, i përket një fëmije kurd 15-muajsh, i cili humbi jetën me familjen e tij duke u përpjekur të kalonte Kanalin e La Manshit.
Kjo u zbulua nga policia norvegjeze, e cila arriti në identifikim përmes një ekzaminimi krahasues të ADN-së. Foshnja, i quajtur Artin, vdiq së bashku me katër anëtarë të familjes së tij kurdo-iraniane, kur anija me të cilën po udhëtonin u mbyt në tetor, ndërsa po përpiqej të arrinte në Mbretërinë e Bashkuar nga Franca.
Për të arritur identifikimin, u mor një profil i ADN-së dhe familja u informua se ishte me të vërtetë Artin, shton i njëjti burim, duke cituar një deklaratë të policisë, duke thënë se “profesionistë të kualifikuar nga departamenti i shkencës ligjore të spitalit universitar në Oslo, arritën të identifikojnë profilet përkatëse të ADN-së”.
Familjarët kishin shprehur dhimbjen dhe konfuzionin e tyre, ndërsa prisnin të dinin se çfarë kishte ndodhur me Artinin. Tani eshtrat e fëmijës do të dërgohen përsëri në Iran për t’u varrosur.
Trupi i Artin u gjet në brigjet e Norvegjisë jugore, afër qytetit Karmoy. Anija në të cilën ndodhej i mituri, u mbyt në 27 tetor 2020.
BBC dhe policia britanike kanë rindërtuar të gjithë udhëtimin e bërë nga familja e tij. Grupi ishte larguar në 7 gusht 2020 nga Kurdistani iranian dhe kishte arritur në brigjet perëndimore të Turqisë. Prej këtu, ai kaloi në brigjet e Italisë, duke ndjekur rrugën në Detin Jon.
Familja e Artinit, dëshironte të arrinte në kampin Dunkirk. 15 njerëz ishin shpëtuar nga fundosja e anijes, dëshmitë e të cilëve bënë të mundur rindërtimin e të gjithë udhëtimit tragjik.
Rruga që i çon migrantët të sfidojnë kalimin e Kanalit anglez nga Franca në Britaninë e Madhe, mbetet ndër më të rrezikshmet. Në javën e parë të qershorit, policia e Mbretërisë së Bashkuar, ndaloi rreth 600 njerëz duke u përpjekur të zbarkonin përtej Kanalit, pasi ishin nisur nga Calais. Në vitin 2020, numri i përgjithshëm i klandestinëve ishte mbi 8,000.
Qeveria e Londrës u përpoq të ndalonte fluksin, duke ndërtuar barriera metalike. Një marrëveshje e arritur nëntorin e kaluar midis Francës dhe Britanisë së Madhe, parashikon një intensifikim të patrullave, gjithashtu me përdorimin e dronëve me një kosto totale prej 31 milionë euro.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje