.png)
Mesazhi i Ambasadores së SHBA në Tiranë, Yuri Kim me rastin e 4 Korrikut hoqi një paralele mes ngjarjes historike amerikane dhe zhvillimeve të tre dekadave të fundit shqiptare.
“Ndërsa festojmë ditëlindjen e 245-të të Shteteve të Bashkuara, shënojmë gjithashtu 30 vjet që kur populli i Shqipërisë refuzoi diktaturën komuniste në përkrahje të demokracisë. Në një nga veprimet tuaja të para si një popull i lirë, Shqipëria i shtriu dorën e miqësisë Shteteve të Bashkuara. Shtetet e Bashkuara e kapën me krenari dorën tuaj në vitin 1991 dhe ne kurrë nuk e kemi lëshuar atë”, deklaron Ambasadorja.
Kryediplomatja e SHBA thotë se do të vazhdojë puna përpara për forcimin e demokracisë, shtetin ligjore dhe forcimin e bashkëpunimit për mbrojtjen e sigurinë dypalëshe si dhe për zhvillimin e sipërmarrjes,
“Ne besojmë se këto të drejta janë të natyrshme, se të gjithë njerëzit janë krijuar të barabartë, se krijuesi u ka dhënë atyre disa të drejta të patjetërsueshme, si jeta, liria dhe kërkimi i lumturisë. Ne besojmë se për të siguruar këto të drejta njerëzit krijojnë qeveri, të cilat i marrin fuqitë e tyre me pëlqimin e të qeverisurve, se sa herë që një formë qeverisjeje i minon këto qëllime, është e drejta e popullit ta ndryshojë, apo ta heqë atë”, citon deklaratën Ambasadorja Kim.
Deklarata e Pavarësisë së SHBA ndahet në dy pjesë. Pjesa e parë denoncon veprimet dhe vendimet arbitrare shtypëse e dhunuese të Mbretit të Anglisë, George III ndaj kolonive dhe banorëve të tyre në Amerikë, ndërsa në pjesën e dytë shpallet Pavarësia dhe parimet kryesore të shtetit të ri që do të lindte pas kësaj deklarate, që pak e mendonin në atë kohë se brenda dy shekujve do të shndërrohej në fuqinë që do të merrte në dorë flamurin e demokracisë në të gjithë botën.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje