.png)
Merkato yjesh te PSG. Pas blerjeve të mesfushorit Xhorxhino Uijnaldum dhe mbrojtësit të djathtë Ashraf Hakimi, klubi francez ka zyrtarizuar edhe afrimin e spanjollit Serxho Ramos. Ish-mbrojtësi i Real Madridit ka firmosur një kontratë deri më 30 qershor 2023 me PSG-në.
Spanjolli kalon te parisienët me parametra zero “Jam shumë i lumtur që po i bashkohem PSG-së, – ka deklaruar mbrojtësi i qendrës. – Është një ndryshim i madh në jetën time, një sfidë e re dhe një ditë që nuk do ta harroj kurrë. Jam krenar që bëj pjesë në një projekt shumë ambicioz. Do të jem në një skuadër me lojtarë të mëdhenj. PSG është një klub që ka arritur në nivelet më të larta dhe ka një bazë solide. Dua të vazhdoj të rritem te kjo skuadër dhe ta ndihmoj atë për të fituar sa më shumë tituj”.
Kalimi i Ramosit te PSG-ja ishte i pritshëm që pas largimit të tij nga Real Madrid. Francezët i kanë plotësuar ekspertit të mbrojtjes kërkesat ekonomike dhe marrëveshja kishte kohë që ishte mbyllur. Tani ka ardhur edhe prezantimi zyrtar për spanjollin. Por drejtuesit e PSG-së nuk do të ndalen këtu.
Radhën duket se e ka mesfushori Pol Pogba, aktualisht pjesë e Mançester Junajtid. Ai është ai objektivi kryesor për PSG-në në këtë moment dhe nëse edhe Pogba bashkohet me këtë skuadër, atëherë ajo do të bëhej vërtet e frikshme jo vetëm në kampionatin francez, por edhe në Ligën e Kampionëve. Një çështje që pret zgjidhje ndërkohë është ajo e sulmuesit Kilian Mbape, i cili ka dëshirë për t’u larguar në një kampionat tjetër.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje