.png)
Që nga 9 gushti, Franca do të zbatojë legjislacionin e ri që e bën të detyrueshme pasaportën shëndetësore për hyrje në kafene, udhëtim me aeroplan apo udhëtim me tren nga qyteti në qytet. Lajmi është bërë i ditur nga zëdhënësi i Qeverisë franceze Gabriel Attal, të mërkurën.
Legjislacioni i miratuar nga Parlamenti në fundjavë, ka nxitur protesta masive në Francë,por duket se institucionet janë të bindura për t’i bërë pasaportat shëndetësore pikë kyçe në luftën kundër koronavirusit.
Një pasaportë e vlefshme shëndetësore sigurohet nga vaksinimi i plotë, testi negativ për koronavirus, apo shërimi nga infektimi. Legjislacioni e bën të detyrueshëm vaksinimin për punëtorët shëndetësorë.
Një dokument i tillë ka qenë obligativ nga 21 korriku për vizita nëpër muze, kinema dhe qendra kulturore me kapacitet jo më shumë se 50 persona.
Zëdhënësi Attal ka thënë se pasaporta shëndetësore do të jetë e obligueshme në kafene, restorante, fluturime dhe udhëtime tjera të brendshme në Francë. Sipas tij, rritja e numrit të të infektuarve është nxitur nga varianti Delta, me një mesatare prej 19,000 rastesh në ditë, çka nënkupton se situata shëndetësore në Francë “po vazhdon të përkeqësohet dhe po bëhet shqetësuese”.
Njoftimi i tij ka ardhur teksa të dhënat kanë treguar se 50 për qind e popullsisë së rritur në Francë, tani është vaksinuar plotësisht kundër koronavirusit.
Politika me pasaportë shëndetësore është arma kryesore e Francës për të luftuar koronavirusin. Presidenti francez, Emmanuel Macron ka thënë gjatë fundjavës se refuzimi për të marrë vaksinën përbën “mungesë të përgjegjësisë dhe egoizëm”.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje