.png)
Lulzim Basha u paraqit këtë të enjte në Gjykatën e Posaçme për të dëshmuar në lidhje me padinë e ngritur për shpifje ndaj kryebashkiakut të Tiranës, Erion Veliaj.
Padia lidhet me fushatën për zgjedhjet e 25 prillit, ku sipas Bashës, në cilësinë e drejtuesit të fushatës së Partisë Socialiste për Qarkun e Tiranës, Erion Veliaj ka bërë tre akuza që ai i cilëson si të rreme. Mes këtyre akuzave edhe deklaratën sipas të cilës kryebashkiaku i Tiranës shprehej se Lulzim Basha ishte bërë me 4 vila.
Padia u ngrit më 30 mars fillimisht në Gjykatën e Tiranës, ndërsa kjo e fundit vuri në dyshim kompetencën e saj në lidhje me këtë çështje, duke arsyetuar se akuza mund të bënte pjesë të kompetencat lëndore të Gjykatës së Posaçme.
Këtë të enjte ishte seanca e ndërmjetësimit për pajtim. Lulzim Basha u paraqit personalisht, ndërsa Erion Veliaj u paraqit me avokat. Seanca e pajtimit dështoi, duke i hapur rrugë nisjes së procesit gjyqësor, ku seanca e parë do të mbahet më 24 shtator.
Ping-pongu mbi kompetencat u zgjidh më 27 korrik nga Gjykata e Lartë që përmes një vendimi unifikues ja kaloi çështje të tilla, Gjykatës së Posaçme. Gjykata e Larrta vlerësoi se për akuzat për shpifje që ngrihen ndaj politikanëve, Gjykata e Posaçme është kompetente.
“Zgjidhjen e mosmarrëveshjes së kompetencës lendore ndërmjet Gjykatës së Rrethit Gjyqësor Tiranë dhe Gjykatës së Posaçme të Shkallës së Parë kundër Korrupsionit dhe Krimit të Organizuar për shqyrtimin e çështjes me viktimë akuzuese Lulzim Basha, kundër të akuzuarit Erion Veliaj për veprën penale ‘Shpifja’ duke përcaktuar Gjykatën e Posaçme të Shkallës së Pare kundër Korrupsionit dhe Krimit të Organizuar, si gjykata kompetente për shqyrtimin e çështjes”, thuhet në vendimin e Gjykatës së Lartë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje