.png)
Donald Trump ka grumbulluar 102 milionë dollarë para cash, burime që duhen shpenzuar për të bërë politikë. Vetëm në gjashtë muajt e parë të vitit 2021, ai mblodhi 82 milionë dollarë. Numra të rëndësishëm për një ish-president të ndaluar nga rrjetet sociale, i akuzuar hapur nga demokratët se ka nxitur sulmin në Capitol Hill më 6 janar të këtij viti dhe me gjyqësorin që ka hetuar çështjet e kompanive të tij.
Trump kurrë nuk e ka çmontuar makinën e tij zgjedhore. Në të vërtetë, pas disfatës nëntorin e kaluar, ai nisi menjëherë një mbledhje fondesh për të financuar, siç tha, çështjet gjyqësore “kundër zgjedhjeve të vjedhura”.
“Koleksioni i madh” ka mobilizuar, para së gjithash, bazën e tij elektorale me një korrespondencë të ngushtë përmes postës elektronike dhe falë mbështetjes së TV dhe radiove lokale.
Mjetet e përdorura, të ashtuquajturat “Komitetet e veprimit politik”, janë dy: “Save America”, të krijuara menjëherë pas fitores së Joe Biden dhe klasikja “Make America Great Again”, marka e debutimit të tij në vitin 2016.
Përveç kësaj, uebfaqja e “DonaldJTrump.com”, pranon depozita. Të shtunën më 31 korrik, ish-presidenti njoftoi se i kishte komunikuar të dhënat financiare për 3-mujorin e parë Komisionit Federal të Zgjedhjeve, siç kërkohet me ligj.
Nga 1 janari deri më 30 qershor 2021, “82 milionë dollarë u konfiskuan nga 3.2 milionë kontribues”. Shuma shkon në 40 milionë të tjera cash, duke e çuar totalin në 102 milionë dollarë.
Në fakt, sipas një analize të gazetës “New York Times”, Trump ka përfituar nga kontributet falë faqes “WinRed”, të drejtuar nga republikanët. Nëpërmjet saj kanë mbërritur 34.3 milionë dollarë: 75% përfunduan në arkën e “Trumpistëve”, ndërsa 25% mbetën në dispozicion të partisë. Por, përtej detajeve, të gjitha këto shifra i dërgojnë një sinjal shumë të qartë botës politike amerikane.
Donald Trump është ende në fushë dhe sipas të gjitha gjasave, synon të qëndrojë atje për një kohë të gjatë. Hipoteza më e cituar, është se ish-ndërtuesi njujorkez, në fakt, tashmë është në fushatë elektorale për zgjedhjet presidenciale të vitit 2024.
Shumë mendojnë se Trump do të luajë gjithashtu një rol kyç në zgjedhjet afatmesme të nëntorit 2022, duke u përplasur kundër “tradhtarëve” dhe “republikanëve të rremë” në zgjedhjet paraprake.
A do të jetë vërtet kështu? Indikacionet që vijnë nga territori janë kontradiktore. Vërtet Trump ka mbështetur disa pretendentë në javët e fundit. Por pothuajse vetëm me fjalë, duke kufizuar sa më shumë mbështetjen financiare.
Rasti më i dukshëm është ai i Susan Wright, që kandidon në një zonë elektorale në Teksas. Donald e kishte marrë atë në Mar-a-Lago, por vetëm në momentin e fundit kishte dhënë dritën jeshile për një investim të kufizuar në reklama.
Përfundimisht Wright u mund nga një republikan i moderuar. Mediat amerikane pyesin veten: a po dobësohet kontrolli i Trump ndaj konservatorëve? Ndoshta.
Raporti i fundit, megjithatë sugjeron një shpjegim tjetër: Trump ende tërheq para dhe ndoshta shumë mbështetje. Por më e rëndësishmja, ai është duke u përqëndruar vetëm në rrugën e tij.
Përshtati: Gazeta “Si”
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje