.png)
Rreth 13.400 njerëz u evakuuan me aeroplan nga Afganistani të mërkurën, njoftoi Shtëpia e Bardhë.
Ky e çon numrin total të të shpërngulurve nga SHBA dhe partnerët e saj të koalicionit në rreth 95.700 që nga 14 gushti.
Ndërkohë, më shumë se 14.500 të evakuuar nga Afganistani kanë zbarkuar në Bazën Ajrore Ramstein në Gjermani, objekti më i madh i Forcave Ajrore të SHBA jashtë Amerikës. Të mërkurën, Sekretari amerikan i Shtetit, Antony Blinken tha se pavarësisht ritmit të transportit ajror, Departamenti i Shtetit vendosi se deri në 1.500 qytetarë amerikanë mund të qëndrojnë ende në terren në Afganistan.
SHBA i qëndron tërheqjes së trupave deri më 31 gusht, që nënkupton edhe fundin e fluturimeve të ushtrive perëndimore.
Ministrja gjermane e Mbrojtjes, Annegret Kramp-Karrenbauer u shpreh për rritjen e presionit të kohës, sipas pikëpamjes gjermane. “Hapësira kohore për evakuime, e cila nuk u konkretizua, po zvogëlohet gjithnjë e më shumë”, tha ministrja gjermane.
Edhe Turqia ka filluar të tërheqë trupat nga Afganistani. Më parë ishte thënë, se trupat turke do të sigurojnë aeroportin e Kabulit edhe përtej misionit të NATO-s. Nuk dihet ende saktë, nëse njerëzit mund të udhëtojnë nga aeroporti i Kabulit edhe pas datës 31 gusht. Talibanët kanë siguruar, se do të mundësojnë largimin në siguri të njerëzve edhe përtej 31 gushtit, tha Sekretari Amerikan i Shtetit, Antony Blinken. Edhe sipas të dhënave të qeverisë gjermane, talibanët kanë premtuar se do të lejojnë largimin e afganëve pas 31 gushtit. Por realiteti do të duket pas kësaj date.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje