.png)
Katër deputetë të dalë nga zgjedhjet e 25 prillit kanë dhënë dorëheqjen pa e marrë detyrën, nëse në këtë listë do të përfshijmë edhe kreun e Partisë Socialdemokrate, Tom Doshi.
Doshi njoftoi dorëheqjen fill pas shpalljes së rezultatit të zgjedhjeve, ku PSD e drejtuar prej tij siguroi tre mandate, dy në Shkodër dhe një në Tiranë. Vetë Doshi e pati vënë emrin në krye të listës së kandidatëve në të dyja qarqet. Ai njoftoi dorëheqjen pas përplasjes me Ambasadën Amerikane, që e përmendi nominalisht se ai nuk duhet të jetë në Parlamentin e ri.
Dorëheqja e dytë ishte vullnetare; ajo e Gramoz Ruçit. I renditur i dhjeti në Qarkun e Fierit, Gramoz Ruçi njoftoi tërheqjen e plotë nga politika pas më shumë se tre dekadash në PS, ku në pjesën më të madhe të kësaj kohe ishte numri 2 i partisë.
Dorëheqja e tretë ishte ajo e Najada Çomos. Drejtorja e Spitalit Infektiv nuk e njoftoi vetë vendimin, por atë e komunikoi Kryeministri Edi Rama që tha se kishte marrë një kërkesë nga vetë Çomo, që i kishte kërkuar të vazhdonte detyrën si mjekë në një kohë që rastet me Covid po shtohen.
Çomo pritet të zëvendësohet në Kuvend nga Mimi Kodheli, që fillimisht renditej e 21-ta mes kandidatëve socialistë të Tiranës, por që pas rirenditjes për shkak të thyerjes së herësit nga Orlando Rakipi dhe Fatmir Xhafaj kaloi e 20-ta.
Dorëheqja e Mark Markut është e katërta dhe e vetmja nga radhët e opozitës. Vendimi i tij nuk lidhet me asnjë prej faktorëve të tre dorëhoqjeve të mësipërme, por me përplasjet e brendshme në PD. Vendi i lënë bosh prej Markut i takon Elda Hotit të Partisë Republikane dhe deputete e legjislaturës që lamë pas si pjesë e së ashtuquajturës “opozitë parlamentare”.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje