.png)
Koret raciste kur futbollistët e Anglisë u ulën në gjunjë për të mbështetur lëvizjen “Black Lives Matter” para ndeshjes me Hungarinë në Budapest, janë vetëm një pjesë e vogël e çmendurisë së tifozërisë vendëse në “Puskas Arena”. “Do të flas me shokët e ekipit, do të denoncojmë gjithçka në UEFA”, – ka thënë kapiteni anglez, Herri Kejn. Skuadra e Southgejt fitoi 4-0 dhe kryeson Grupin I, ku bën pjesë edhe Shqipëria, por ndeshja në fjalë është e destinuar të sjellë diskutime.
Hungaria duhet të luajë 3 ndeshje me dyer të mbyllura, pasi UEFA i konsideroi fajtorë tifozët e saj për sjellje diskriminuese gjatë Euro 2020. Por ndeshja me Anglinë, duke qenë kualifikuese e Botërorit, organizohet nga FIFA, që lejoi praninë e 67.000 personave në stadiumin e Budapestit. Tifozët hungarezë filluan të ndiheshin që në nxemjen e Anglisë, ku i pari që u vu në shënjestër ishte Belingam. Pastaj nisën koret kur lojtarët anglezë u gjunjëzuan.
Ndaj Rahim Sterling vërshuan gota plastike dhe shishe uji, kur ai shënoi golin e parë të ndeshjes, ndërsa pas golit të Meguajër në fushë u hodhën edhe fishekzjarre. Po ashtu, u hodhën edhe shishe me pije, një prej të cilave Grealish e mori dhe e piu, duke sfiduar tërbimin e tifozëve. Pas ndeshjes, kur trajneri Southgejt po fliste për “Bbc Radio”, tifozët hungarezë hodhën ndaj tij kuba të vegjël akulli.
“Gjatë ndeshjes nuk kuptova asgjë, – u shpreh Southgejt. – E dinim që vendimi për t’u ulur në gjunjë do të sillte reagime, por ne mendojmë se është ajo që duhet të bëjmë. Një reagim i tillë është i papranueshëm”. Edhe mbrojtësi Stons tha se nuk i kishte dëgjuar koret raciste: “Më thanë për atë që ndodhi dhe është diçka e trishtë. Shpresoj të merren masa, ne do të vazhdojmë të luftojmë për atë që besojmë dhe që mendojmë se është e drejtë”.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje