.png)
Java e parë e kampionatit është mbyllur sot, me ndeshjet Kastrioti-Dinamo dhe Egnatia-Kukësi. Kanë fituar dy skuadrat mike, Dinamo dhe Kukësi, duke u dhënë një sinjal rivalëve se janë edhe ata në garën e titullit kampion këtë sezon.
Dinamo, që rikthehet në futbollin elitar shqiptar pas 9 vitesh, mposhti Kastriotin në stadiumin e Kamzës me rezultatin 0-2. Të dy golat u shënuan në pjesën e parë nga sulmuesi afrikan, Stefen Çinedu. Skuadra kryeqytetase pati edhe raste të tjera në vazhdim, por në pjesën e dytë e uli pak ritmin e lojës, duke menduar më shumë për administrimin e rezultatit.
Trajneri Bledi Shkëmbi ka debutuar me fitore në stolin dinamovit. Tifozët blu, të cilët mezi e kanë pritur rikthimin e “nëndetëses”, siç njihet nga të gjithë Dinamo, nuk kanë munguar në stadium, ndërkohë që me shumë interes prej tyre priten derbit me Partizanin dhe Tiranën.
Ka fituar edhe Kukësi në fushën e Rrogozhinës, me rezultatin 1-3. Daci dhe Peposhi shënuan në pjesën e parë për skuadrën e drejtuar nga trajneri italian, Diego Longo. Egnatia shkurtoi diferencën në minutën e fundit të ndeshjes me Bruno Telushin, ndërsa Milunoviç realizoi edhe golin e tretë për Kukësin në kohën shtesë. Një përgjigje kjo nga ana e kuksianëve për rivalët e tyre, që e kanë nisur kampionatin me fitore.
Abissnet Superiore, java e parë
Teuta-Partizani 1-0
Laçi-Vllaznia 3-5
Tirana-Skënderbeu 4-2
Kastrioti-Dinamo 0-2
Egnatia-Kukësi 1-3
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje