.png)
Kuvendi mblidhet këtë të enjte në seancën e radhës plenare, që ndryshe nga seanca pararendëse, ku u miratua programi dhe qeveria e re, parashikohet të jetë më e qetë dhe të shërbejë edhe si test se ç’rrugë do të ndjekë bashkëpunimi PS-PD në parlament për çështje të tjera më të rëndësishme.
Në rend të ditës është plotësimi i komisioneve të përhershme parlamentare, si çështja më e rëndësishme. Në seancat e kaluara u zgjodhën drejtuesit e këtyre komisioneve, ndërsa plotësimi me anëtarë u shty me kërkesë të Partisë Socialiste pas pretendimeve të LSI-së së ishte lënë jashtë këtyre komisioneve.
PS fajësoi Partinë Demokratike se kishte dorëzuar më shumë propozime nga sa i takonin, duke përfshirë edhe të njëjtat emra në dy komisione të përhershme parlamentare, që në pretendimin e socialistëve ishte në kundërshtim me rregulloren e Kuvendit.
PD këmbënguli se propozimet e tyre janë në përputhje me rregulloren e Kuvendit, ndërsa akuzoi PS se po kërkon që të reduktojë hapësirat e opozitës në Kuvend.
Një tjetër çështje që ka nisur të diskutohet jozyrtarisht mes mazhorancës dhe opozitës është ndërhyrja në Kushtetutë për të zgjatur afatet e komisioneve të vettingut, që përfundojnë në korrik të vitit të ardhshëm. PS thotë se ndërhyrja në Kushtetutë për të zgjatur këto afate është zgjidhja më e mirë pasi ruan standardet e njëjta të këtij procesi, ndërsa nga PD nuk ka ende një qëndrim zyrtar për këtë çështje.
Ndërkohë, në një tjetër zhvillim, Sekretari i Përgjithshëm i PS-së, Damian Gjiknuri nuk përjashtoi mundësinë e dialogut me PD për të ndërhyrë te reforma administrative territoriale, e kritikuar nga Partia Demokratike, që kërkon ndryshimin e saj.
Në këtë seancë mungon Kryeministri Edi Rama, i cili ndodhet në Nju Jork për të marrë pjesë në punimet e Asamblesë së Përgjithshme të OKB.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje