.png)
Ish-zëvendës kryeministri Erion Braçe, aktualisht deputet i PS, ka kërkuar rroga më të larta për punëtorët dhe kushte më të mira pune.
“Punëtorë kërkoni? Rritini rrogat dhe do i keni! Vendosni prag të ri minimal taksimi, shkallë të re progresiviteti dhe keni mbrojtur të ardhurat e tyre! Pandemia nxori në pah se sa informalitet, padrejtësi, pabarazi, paligjshmëri ka në treg e çdo ndërmarrje, ashtu dhe zhvillimi teknologjik solli me gjithë shkëlqimin e tij prapambetjen, pasigurinë fizike e shëndetësore, efektivitetin e ulët të mënyrës së organizimit të punës kudo; mbi të gjitha rrogat, një nga instrumentet themelore të vlerësimit të dijes dhe aftësive, punës mundit, djersës, sakrificës së çdo punëtori, shërbyesi publik e jo vetëm, nëpunësi etj. Po humbim punëtorë prej rrogave dhe kushteve të tjera të punës!”, shkruan Braçe duke nënvizuar: “Kush ankohet se nuk gjen punëtorë, të rrisë rrogat e tyre dhe do i ketë! Në tremujorin e dytë të këtij viti, paga mesatare mujore ishte 56. 710 lekë, në shtet 68. 196 lekë, në privat 51. 247 lekë, paga minimale 30. 000 lekë”.
Sipas Braçes, shumica e punëtorëve në sektorë të tjerë si bujqësi, ndërtim, tregti e transport, kanë një rrogë edhe më të vogël se mesatarja mujore, duke evidentuar si problem faktin se tatimi progresiv mbi rrogat nis që me rrogën 30. 001 leke
“Shumica dërrmuese e punëtorëve në sektorët me punësim masiv, bujqësi, industri, ndërtim, tregti, transport, shërbime hotelerie e ushqimi, kanë një rrogë më të vogël se rroga mesatare mujore; më e keqja, edhe sipas grup profesioneve, përsëri në secilin prej sektorëve, punëtorët paguhen me rroga nën mesataren mujore: bujqësia paguan një rrogë mesatare mujore prej 35. 887 leke, industria 48. 093 leke, ndërtimi 42. 505 leke, tregtia, transporti, shërbimet etj 43. 034 leke. Më e keqja akoma është se tatimi progresiv mbi rrogat nis që me rrogën 30. 001 leke. Më e keqja fare është se këto rroga paguhen edhe në sektorë me norma fitimi të larta siç ndërtimi, me çmime në rritje dhe jo për shkak të punëtoreve! Ditë më parë, me hyrjen e masave të reja ne kufij, dëgjova punëtoret shqiptarë në sektorin e ndërtimit në Malin e Zi se paguheshin me 20 euro/dita. Shiheni me sa paguhet i njëjti punëtor këtu; ndaj nuk gjeni punëtorë. Rritini rrogat, përmirësojini kushtet e punës!”.
Sipas tij, rroga minimale duhet të rritet në 40 mijë lekë.
“Ne duhet të rrisim rrogën minimale, të vendosim nivelin e ri minimal të tatueshëm e shkallët e reja të tatimit progresiv për të mbrojtur punëtorët dhe shtresën e mesme; 40 mije leke dhe tani! Kjo është çështje e PSSH”.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje