.png)
A përbën vendimi “non grata” shkak për të humbur mandatin e deputetit? Komisioneri Shtetëror i Zgjedhjeve, Ilirjan Celibashi përgjigjet se ligji për dekriminalizimin nuk e ka të specifikuar qartë këtë çështje.
Në një interviste për A2CNN ai propozon ndërhyrje ligjore me qëllim që shmangen interpretimet dhe debatet në zbatim.
“Ndoshta disa përkufizime në lidhje me kushtet e ndalimit. Duhet të ketë qartësi më të madhe në kodin zgjedhor në mënyrë që të mos jenë pjesë e diskutimeve apo interpretimeve, sipas interesit politik apo interesave të tjera”, tha Celibashi.
“Në tërësi ky ligj ka justifikuar qëllimin edhe pse secili prej nesh ka kriticizmin e vet se sa proporcional është ky ligj për të pasur institucione përfaqësuese të pastra në kuptim të përbërjes së tij”, vijoi Celibashi.
Debati për ndërprerjen e mandatit parlamentar të deputetëve të shpallur “non grata” nisi me rastin e Tom Doshit, kur PD i kërkoi zyrtarisht Komisionit Qendror të Zgjedhjeve moskandidimin e tij në zgjedhjet e prillit të kaluar.
Kjo kërkesë u mbështet edhe nga anëtarja e PD-së në KQZ, Helga Vukaj. Ilirjan Celibashi nuk e cilësoi shkelje ligjore kandidimin e Doshit pasi ligji nuk e kishte të specifikuar një klauzolë të tillë.
Megjithatë, debatin më vonë e mbylli vetë Tom Doshi duke dhënë dorëheqjen një ditë pas zgjedhjeve të 25 Prillit edhe pse partia që ai drejton kishte marrë tre mandate deputeti
E njëjta situatë është krijuar edhe me Sali Berishën, që do të thotë se pa ndërhyrje në ligj, pavarësisht se kush e propozon, ai do të vijojë të jetë deputet edhe pse i shpallur “non grata”
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje