Putin në Kinë: Kemi të njëjtat opinione për problemet e botës

Gazeta Si – Marrëdhëniet midis Rusisë dhe Kinës “po zhvillohen mbi një bazë të barabartë, de-ideologjike. Partneriteti ynë është i qëndrueshëm, thelbësisht i vlefshëm, i pandikuar nga klima politike dhe i drejtuar kundër askujt”.

Kreu i Kremlinit, Vladimir Putin, pas mbërritjes së tij në Pekin për inaugurimin e Lojërave Dimërore, tha në një intervistë për “China Media Group”, se me presidentin Xi Jinping, “ne njihemi për një kohë të gjatë, si miq dhe politikanë që kanë kryesisht të njëjtat pikëpamje për trajtimin e problemeve të botës. Ne mbajmë kontakte të ngushta dhe të shpeshta”.

Gjithashtu, bazuar në marrëdhëniet me Xi, “unë iu përgjigja menjëherë ftesës së tij për të vizituar Kinën dhe për t’u bashkuar me miqtë tanë kinezë në festimin e ngjarjes madhore sportive të këtij viti, Lojërat Olimpike Dimërore”.

“E di që organizatorët bënë një punë të mirë në përgatitjen e Lojërave: ata bënë investime të mëdha në infrastrukturën sportive dhe transportuese, ndërtuan objekte sportive moderne dhe krijuan një mjedis jetese të sigurt për atletët, trajnerët dhe gazetarët e huaj”, përfundoi kreu i Kremlinit.

Atmosfera e besimit politik të krijuar, edhe falë Traktatit të Fqinjësisë së Mirë dhe Bashkëpunimit Miqësor Rusi-Kinë, ka lejuar “vendet tona të krijojnë një strukturë shumë-shtresore të bashkëpunimit ndërshtetëror, me takimet e dy liderëve që luajnë një rol themelor”, – vijon Putin.

Kina, shtoi Putin, “mbetet në krye të listës së partnerëve tregtarë të Rusisë”, me tregtinë dypalëshe në nivelin më të lartë të të gjitha kohërave në 2021 në 140 miliardë dollarë dhe është “partneri ynë strategjik në arenën ndërkombëtare. Qasjet tona për shumicën e çështjeve në axhendën globale, janë të dakordësuara ose janë shumë të afërta”.