.png)
Organizata Botërore e Shëndetësisë u ka bërë thirrje vendeve të pasura që të paguajnë urgjentisht 14 miliardë dollarë, për të financuar programin e saj për të luftuar pandeminë e koronavirusit.
“Shkenca na ka dhënë mjetet për të luftuar pandeminë, nëse ato ndahen në mbarë botën në mënyrë të barabartë, ne mund t’i japim fund këtë vit urgjencës globale shëndetësore të shkaktuar nga Covid-19,” tha drejtori i Përgjithshëm i OBSH-së, Tandos Adanom Gebregesous.
“Nëse vendet me të ardhura të larta paguajnë pjesën e tyre, ky program “mund të ndihmojë vendet me të ardhura të ulëta dhe të mesme të kapërcejnë normat e ulëta të vaksinimit kundër Covid-19, testet e pakta dhe mungesën e ilaçeve”, theksoi Gebregesous.
ACT-A, programi për të përshpejtuar aksesin në mjetet kundër Covid-19, është një mekanizëm i krijuar nga agjencitë kryesore ndërkombëtare shëndetësore, si dhe nga Banka Botërore dhe Fondacioni Bill & Melinda Gates.
Një nga aspektet e tij është sistemi COVAX, i cili u krijua në fillim të pandemisë, në përpjekje për të garantuar akses të barabartë të vaksinave në të gjithë botën. ACT-A kërkoi rreth 23.4 miliardë dollarë për periudhën tetor 2021 – shtator 2022, por deri më tani janë mbledhur vetëm 800 milion dollarë.
Prandaj, programi kërkon 16 miliardë dollarë nga vendet e pasura “për të mbushur boshllëkun e menjëhershëm të financimit”, ndërsa pjesa tjetër pritet të vijë nga vetëfinancimi i vendeve me të ardhura mesatare.
Burimi:Euronews.eu/Gazeta “SI”
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje