.png)
Qetësia e dëshmisë së Erion Veliajt në Komisionin hetimor parlamentar për incineratorët zgjati vetëm pak minuta dhe i la vendin përplasjes mes kryetares së komisionit, Jorida Tabaku dhe kryebashkiakut.
Tabaku nisi seancën e pyetjeve nëse i njihte, apo kishte takuar ndonjëherë pronarët e incineratorëve, Mirel Mërtiri, Klodian Zoto dhe Stela Gugallja.
“I kam njohur nga portalet ku i kam parë në një foto në Zimbabve me përfaqësuesin e PD, Gerd Bogdani”, u përgjigj Veliaj.
Debati shpërtheu kur Tabaku i kërkoi kryebashkiakut bazën ligjore të vendimit ku është shprehur pro incineratorit të Tiranës.
“Më ka autorizuar pika 1 e nenit 5 të ligjit Nr.139 “Për vetëqeverisjen vendore i ndryshuar”, në germën “gj” të nenit 64 përcakton se ‘kryetari i bashkisë ushtron të drejtat dhe siguron plotësimin e të gjitha detyrimeve që i janë ngarkuar bashkisë si person juridik dhe është përfaqësuesi i saj në marrëdhëniet me të tretët’. Për sa kohë që jam zgjedhur kryetar i bashkisë kam të drejtën për të hyrë në marrëdhëniet me të tretët”, tha Veliaj.
Por, Tabaku tha se Veliaj gënjeu nën betim, pasi sipas parashikimit të këtij ligji, ai nuk ka këtë kompetencë për të firmosur shkresën ku shprehet pro incineratorit, pasi kjo kompetencë është e Këshillit Bashkiak.
Veliaj reagoi se kjo ishte pjesë e shpifjeve dhe i kujtoi Jorida Tabakut se është dënuar për shpifje nga gjykata. “Jam dënuar nga gjykata që e ndikon ti. Unë nuk kam ndërmend të kontrolloj gjykata”, u përgjigj Tabaku.
Më tej, kryetarja e Komisionit i kërkoi Veliajt se me ç’vendim të Këshillit Bashkiak ka detyruar të gjithë ndërtuesit që të hedhin dherat te incineratori i Sharrës.
Pas debatesh të forta të shoqëruara me fjalën “qetësi”, kryebashkiaku i Tiranës tha se kjo ishte një marrëdhënie mes ndërtuesve dhe kompanisë së incineratorëve, një marrëdhënie private që nuk ka lidhje me Këshillin Bashkiak, ndërsa Tabaku e akuzoi se nuk ka një vendim të Këshillit Bashkiak për këtë monopol.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje