.png)
Gazeta Si – Për vite dhe deri në vitin 2003, Mikhail Khodorkovsky ishte ndër njerëzit më të pasur në Rusi. Kur filloi të linte të kuptohej se mund të sfidonte liderin e Kremlinit për të zënë vendin e tij, Putini e arrestoi dhe e gjykoi, e la në burg për 10 vjet, kohë në të cilën kompania e tij – “Yukos” – kishte ndryshuar drejtim.
Që atëherë, Khodorkovsky ka jetuar larg Rusisë, në Londër dhe është disidenti kryesor në mërgim. Javët e fundit, ai ka folur gjatë për situatën në Ukrainë, duke shpjeguar “funksionimin” e mendjes së presidentit rus.
Në CNN, më 4 mars, ai shpjegoi se Putinit “nuk i ka mbetur shumë kohë: një vit apo tre. Mundësia e tij për të mbetur në pushtet është zvogëluar shumë që nga pushtimi – ne as nuk mund ta imagjinojmë ta shohim atë në pushtet edhe për një dekadë tjetër”.
Dhe kur u pyet për përdorimin e mundshëm të bombës atomike nga Putin, përgjigja ishte: “Ai mund të bëjë gjithçka”.
Por në një intervistë të re me Fareed Zakaria, gjithashtu në transmetuesin amerikan, Khodorkovsky shpjegoi sesi – sipas tij – Perëndimi po bën gabime ndaj liderit rus.
Është gabim – sipas tij – të mendosh se oligarkët mund ta shtyjnë Putinin të ndryshojë mendje: “Rusia nuk është oligarki: është diktaturë dhe oligarkët janë vetëm vegla, agjentë të Kremlinit. Ata nuk mund të ndikojnë te diktatori”.
Dhe madje edhe ushtria apo shërbimet sekrete kanë mundësi të kufizuara: “Sigurisht, ka njerëz që mund të ndikojnë në të menduarit e tij, po mendoj për Yuri Kovalchuck, ose njerëzit përreth tij. Por vendimi përfundimtar është i tij”.
E vetmja gjë që mund ta bindë Putinin, është forca: “Gjatë gjithë jetës së tij, ai është marrë me elementë kriminalë dhe është dashur të merret me botën e krimit. Nuk respekton ligjin. Nëse nuk i tregohet forcë, nëse ai mendon se je i dobët – siç mendon ai, për shembull, për Macron-in – do të bëjë atë që dëshiron me cilindo që ka përballë”.
Për këtë arsye, nëse duhet të bëhet një kritikë ndaj Bidenit, nuk është për faktin se Putini nuk duhet të mbetet në pushtet: “Ato deklarata janë absolutisht të sakta. Por nëse nuk shoqërohen me forcë, ato fjalë tingëllojnë të dobëta për Putinin. Nëse Biden thotë: do të ketë një përgjigje të fortë ndaj përdorimit të armëve të shkatërrimit në masë, ky nuk është një provokim, por një frenim për Putinin. Nëse Scholz ose Macron thonë, përkundrazi, se nuk do të shkojnë në luftë me Putinin, kjo e inkurajon atë. Qëndrimi i tyre tregon një mungesë thelbësore të të kuptuarit të mekanizmave mendorë të Putinit”.
Tani Putini po përballet me një “situatë të ndërlikuar: ai donte të ndryshonte regjimin ukrainas, priste të pritej nga ukrainasit me lule në rrugë dhe kur kjo nuk ndodhi, ai u çmend”.
Ka tre rrugëdalje, sipas ish-oligarkut të Kremlinit. “Vazhdimi i të bërit presion mbi Ukrainën – edhe pse me kosto për të humbur njerëz dhe pajisje; përdorimi i armëve të shkatërrimit në masë; ose nisja e negociatave reale. Nëse NATO do të thoshte njëzëri, se nëse Putin përdor armë të shkatërrimit në masë, Aleanca do të reagojë, Putini do të detyrohej të ulej në tryezën e bisedimeve”.
Megjithatë, nëse lideri i Kremlinit do të dilte “fitues” nga lufta, pasojat do të ishin shumë të rënda, thotë Khodorkovsky: “Në kokën e tij, Putin tashmë është në luftë me SHBA-në dhe NATO-n. Propaganda e tij tashmë ka filluar të përgatisë opinionin publik rus për një luftë me NATO-n. Ky nuk është hapi i fundit: tjetri, janë vendet Balltike (Lituani, Letoni, Estoni). Për një kohë të gjatë, Putini ka qenë i orientuar drejt pasurisë. Por si shumë kriminelë të moshuar, ai tani mendon se ka një mision: dhe kjo është më e frikshme”.
Përshtati: Gazeta “Si”
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje